Xeración Dixital

Dez empresas participaron na reunión para crear unha Asociación de Empresas Galegas de Software Libre. Segundo informa Mancomún, os asistentes amosáronse "optimistas e dispostas a traballar para defender os intereses comúns e establecer redes de dinamización".

A partir do encontro, realizado na Escola Técnica Superior de Enxeñería de Santiago, formouse un grupo de traballo encargado de dar os primeiros pasos na constitución da Asociación. O organismo estará aberto a todas aquelas empresas que queiran integrarse nel.

Javier Vázquez, de Igalia, e Roberto Brenlla, de Agnix, informan hoxe nos seus blogs das conclusións da xuntanza e resumen a filosofía e obxectivos da Asociación:

• Fomentar o software libre como ferramenta para desenvolver a sociedade da información en Galicia.
• Fomentar e asesorar á Administración galega no proceso de migración cara o software de código aberto.
• Promocionar a colaboración entre empresas locais e a relación coas empresas do resto do estado.