Xeración Dixital

O coordinador do PSOE en Ourense e conselleiro de Medio Ambiente, Manuel Vázquez, xa puxo en mans dos asesores xurídicos datos que corroboran a existencia de 16 persoas censadas no domicilio do alcalde de Ourense e candidato a reelección polo PP, Enrique 'Poly' Nóvoa.

O popular xustificou que isto non fora un empadronamento casual, senón que xa hai máis de 9 anos que na súa casa están censados a súa nai, a súa coidadora, a súa madriña e a súa filla, ademais de dous irmáns e as súas familias, porque a súa é unha familia tradicional e moi ampla.

Manuel Vázquez, pola súa parte, manifestou que todo apunta que algunhas de esas 16 persoas teñen residencia habitual fóra da cidade de Ourense e mesmo de Galicia. Por iso solicitoulle a dimisión inminente como alcalde da cidade porque a situación é "moi grave".

Ribadumia e Arbo
Non é Nóvoa o único sospeitoso de empadronamento masivo. Modesto Pose, coordinador do PSOE provincial de Pontevedra, denunciou onte que militantes e simpatizantes do PP nos concellos de Arbo censaran de xeito irregular a máis de 200 persoas. Pose asegurou que existe toda unha enxeñería electoral premeditada por parte do PP para falsear a vontade dos electores, traendo persoas de concellos nos que "cren que a súa vitoria está asegurada".

O socialista cre que se debe a que os responsables do PP "deben de estar preocupados polas alcaldías da provincia ou polo resultado na Diputación". O caso de Arbo sería o máis preocupante, xa que detectaron máis dun cento de persoas censadas en casas en ruinas ou abandonadas, sen que os seus propietarios o saiban. Mesmo na estación de tren están censadas 6 persoas.