Xeración Dixital

A empresa tecnolóxica galega Esinor, con sé na Coruña, está negociando co Goberno de Kuwait a instalación no país árabe do sistema 'Computer Craft', unha ferramenta desenvolvida integramente en Galicia e que permite controlar o alumado público reducindo o consumo e incrementado a súa eficiencia enerxética.

A próxima semana, unha delegación do Ministerio de Industria kuwaití coñecerá 'in situ' o funcionamento das instalacións de Esinor no Parque Tecnolóxico de San Cibrao das Viñas. Neste complexo, a comitiva árabe poderá comprobar o rendemento dun sistema capaz de reducir en máis dun 60% o gasto enerxético do alumado, deseñado en colaboración coa Universidade de Vigo e que xa estea presente nunha treintena de concellos.

Para levar a cabo esta operación, o Grupo Esinor irá da man da multinacional norteamericana General Electric. "Eles son os que poñen as luminarias, e nós o que facemos é venderlle a nosa tecnoloxía a General Electric porque neste momento non a ten. Trátase dunha tecnoloxía ao nivel máis alto en todo ou mundo", explica o director xerente do grupo, Manuel Lombardía.

Aforro enerxético
O éxito do sistema 'Computer Craft' baséase na súa capacidade para controlar, un a un, todos os puntos de luz que compoñen o alumado público dunha cidade ou municipio. Desta forma "o alumado funciona cando, onde e no momento en que é necesario", adaptando a potencia de cada farola ás horas de menos luz, os momentos de maior circulación viaria ou os días da semana nos que transita máis xente polas rúas.

A incidencia deste produto nos orzamentos municipais salta á vista. Nalgúns concellos -sobre todo rurais- o alumado chega a absorber o 20%, mentres que en cidades como A Coruña ou Vigo, o aforro pode alcanzar os 5 millóns de euros anuais.

Aínda que o sistema xa se está levando ao resto de España e a outros países da Unión Europea, 'Computer Craft' está colleitando grandes resultados en Galicia pola peculiaridade que supón a dispersión xeográfica existente na comunidade. "En Levante ou Andalucía hai un punto de luz por cada 10 habitantes, pero aquí atopámonos ou contrario: concellos que teñen máis puntos de luz que habitantes", explica Lombardía.

Á vez que 'Computer Craft' se vai abrindo camiño no estranxeiro, Esinor prevé presentar en breve novos produtos deseñados na mesma liña de aforro enerxético. Mentres tanto, o responsable defende a alta calidade dos profesionais da tecnoloxía en Galicia. "Contamos con profesionais pouco coñecidos e pouco valorados pero moi cualificados", sinala Lombardía como clave do éxito, por iso é polo que o feito de fabricar alta tecnoloxía na comunidade "non creo que sexa moito máis complicado" que noutras partes de España.