Xeración Dixital

Sexas mileurista, mediomileurista, casado con fillos ou solteiro con complexo de Edipo, tranquilo, os bancos adaptaranse sempre ás túas necesidades. ¿35 anos e segues a vivir na casa dos teus pais? Despois dunha carreira, un máster e tres anos de bolseiro que te levaron a asinar con sangue un contrato temporal, vai sendo hora de devolverlle á sociedade os favores prestados.

¿Que che parece unha hipoteca xove a 50 anos? Destinando unha módica cantidade, entre o 40 e o 60% da túa nómina, ese pisiño precioso nas aforas pode ser teu. É comprensible que che dea medo facelo en solitario, pero sempre podes recorrer a unha parella con nómina. A pesar do que digan algúns, a familia tradicional non corre perigo nunha sociedade con sólidos lazos edificados sobre débedas e préstamos. Máis do 80% dos novos fogares formados en Galicia pasan polo trámite de pagar unha hipoteca.

O que o interese variable consiga unir, que non o separe o Euribor.

Búscase compañeiro de hipoteca
Certo é que os tempos cambian e a fidelidade xa non é o que era, así que é normal temer que a relación amoroso-hipotecaria acabe por non funcionar. Sorte que o sector bancario teña esa capacidade de adaptación ás novas realidades sociais.

“60 metros cadrados, luminoso e con calefacción central. Búscase compañeiro para compartir hipoteca”. En aparencia, ver este anuncio pegado nunha farola ou nun taboleiro desafía a todo sentido común. Malia todo, as hipotecas compartidas, son unha das solucións propostas para perpetuar o soño da vivenda en propiedade, mesmo se hai que distribuír esa ilusión entre varios.

Procedente de Gran Bretaña, este produto chegou con timidez a España, aínda que a maioría das entidades bancarias ofrecen novos préstamos nesta dirección. Non sería de estrañar a súa extensión dada a nosa querenza pola vivenda propia, a pesar das dificultades para acceder a ela. As familias españolas adican o 42% da súa renda á compra, unha porcentaxe que se eleva ata o 55% no caso dos máis novos. Inmigrantes, persoas divorciadas ou separadas e mozos profesionais que pasan longas tempadas fóra da cidade de orixe son outros sectores beneficiados por este remake capitalista das “citas a cegas”.

¿Existe saída de emerxencia? Este préstamo require confianza, pero non ilimitada. A principal particularidade das hipotecas compartidas son as vías de escape que incorporan para casos de arrepentimento ou morosidade, facilitando a liquidación e cancelación do crédito e sen que afecte aos demais co-hipotecados.

Para gustos pintan hipotecas
Hipotecas de interese fixo, variable, mixto, xiratorias, tranquilas, revolving,  recargables, laranxas, de cota blindada, por tramos, multidivisas... É a revolución do “freshbanking”: un completo mosaico para entrar no do club do insomnio crónico e de adictos ó Euribor. A taxa de endebedamento en Galicia supera xa o 40% da salario bruto, pero se che falta liquidez para un caprichiño ou non chegas a fin de mes, sempre podes ampliar a hipoteca ou pedir un préstamo ó consumo. A vida a prazos pode ser marabillosa.

E cando cumpras os 90 anos, poida que sintas un inmenso baleiro ó liquidar a túa hipoteca xove e consumir a última gota dese elixir da eterna xuventude. Nese intre, comprobado que os 560 euros de pensión media que reciben os retirados galegos non dan para luxos, será o momento de aceptar a realidade: entre ti e as hipotecas había unha relación para toda a vida. Así que para recuperar ese cordón umbilical, aí está a hipoteca inversa.

Sen abandonar a vivenda, a túa pensión incremetaranse nunha media de 700 euros. A débeda deste dourado atardecer pasará os teus herdeiros, que sempre poderán liquidala -xunto ós intereses- para quedarse co pisiño. E ao son do bolero de Machín sonará “toda una vida, me estaría contigo, no me importa en qué forma...”

SE O SEI NON ME HIPOTECO

• Inés Liste 28 anos, 3 anos pagados dos 35 da súa hipoteca que lle leva o 35% do seu salario. “Hoxe pensábao dúas veces, pero hipotecarme outra vez eu soa non o faría, sobre todo a estes prezos. Agora non podo viaxar tanto nin permitirme caprichos”.
• Carlos Dávila, 30 anos, hipoteca a 20 anos que consome un terzo do soldo. “É un investimento, vivo con meus pais, porque senón non me chegaría para independizarme. É un problema moi gordo, con difícil solución por parte da sociedade, pero somos nós quen temos que reaccionar para frealo.”
• Laura Núñez, 28 anos, 35 de hipoteca en Ourense, ao que lle suma un aluguer en Compostela ao cambiar de traballo. “Hoxe non me hipotecaría, quedaría de alugueiro. Meus pais conseguiron ter a súa casa, pediron un préstamo e pagábano en 10 anos, houbo un cambio que non está adaptado aos salarios”.

HIPOTECAS GALEGAS EN CIFRAS

• En 2006 subscribíronse 6.649 hipotecas en Galicia.
• Máis de 1.000 maiores galegos teñen contratada unha hipoteca inversa.
• O Euribor duplicouse dende 2003, e estímase que en 2009 a revisión da hipoteca supoña uns 1,800 euros máis ao ano.
• O valor medio dun préstamos hipotecario aumentou un 30% con respecto a 2005.
• Cada mes, 90 galegos son declarados morosos por non poder afrontar o pago da hipoteca.
• O endebedamento triplicouse nos últimos 3 anos.
• O metro cadrado custa 1,000 euros máis ca 10 anos atrás.
• A vivenda subiu en Galicia un 9,1%

(Datos do INE e da Asociación Española de Hipotecas)