Xeración Dixital

O presidente da Xunta e secretario xeral dos socialistas galegos, Emilio Pérez Touriño, anunciou que non irá o programa "Hai debate" da Televisión de Galicia porque a súa intención é "non ocultar" ós candidatos a alcaldes "que son os auténticos protagonistas".

Por iso o PSdeG elixíu a López Orozco, actual alcalde de Lugo e que aspira a renovar o seu mandato por ser o "alcalde máis votado, máis valorado e o que ten maioría absoluta", argumentou Touriño. Sinalou que dende o seu partido "non queremos substituír aos candidatos, nin tapar, nin condicionar o debate que se debe producir en termos democráticos en eleccións municipais" e que serán "os que teñen algo que ocultar e tapar os que vaian alí, se senten, e non poñan a quen teñen que poñer".

Afirmou a súa vontade de acudir a un plató de televisión cando sexa candidato á presidencia da Xunta. Apuntou ademais que é o primeiro presidente da Xunta que debate cada semana no parlamento galego.

"Fraude á democracia"
Tanto Anxo Quintana como Alberto Núñez Feijoo xa respostaran afirmativamente á invitación da televisión pública e criticaran o silencio do PSdeG sobre a cuestión. O líder do PPdeG sinalou onte en Bueu que se Touriño non acudía ó encontro "sería un fraude á democracia, e significará que non quere contrastar o seu programa, ideas e opinións".

Pola súa parte, Anxo Quintana manifestara que "o bo en Democracia sería que ir a un debate non fora noticia. O que quere a xente é que deixemos de falar nos mitins e debatamos as nosas ideas".