B.V (Santiago).
Ata 3.395 sinaturas apoiarán a candidatura do escritor e intelectual Xosé Luís Méndez Ferrín ó Premio Nobel de Literatura. As firmas foron recollidas pola Fundación Curros Enríquez, afincada no concello ourensán de Celanova, onde Ferrín pasou os anos da infancia.
Así, o Pen Club de Galicia recibirá nestes días unha copia das sinaturas, que irá adxunta ó expediente elaborado polo colectivo para propoñer ó poeta e narrador na Academia Sueca.
A iniciativa comezou no 2002 co gallo da feira de artesanía Raigame, que se celebra en Vilanova dos Infantes. Dende aquel entón, veciños e visitantes foron deixando a súa opinión e as mostras de apoio para Ferrín nun libro que quedou exposto na Oficina de Información e Turismo do Concello de Celanova.
A continuación recolleu o testemuño a Casa dos Poetas, ata o pasado mes de outubro. Foron máis de tres mil as persoas que asinaron para que Méndez Ferrín sexa Nobel de Literatura.
30/11/2007
