Xeración /Axencias.
A inflación interanual entre novembro de 2007 e novembro de 2006 aumentou cinco décimas ata o 4,1%, segundo os datos provisionais do Instituto Nacional de Estatística (INE). De confirmarse esta cifra, sería a máis alta dende xaneiro de 2006, cando se acadou un 4,2%.
O INE adiantou onte o Índice de Prezos de Consumo Armonizado (IPCA), que mide os prezos en comparación co resto dos países da zona euro e cuxo dato definitivo coñecerase o 14 de decembro, ao igual que o do IPC español (aínda que ambas as dúas cifras adoitan coincidir). A última taxa de IPC do ano serve para fixar o valor das pensións do ano seguinte e, segundo os cálculos da seguridade social, cada décima que supere o 2% custaralle ao goberno 72 millóns de euros.
Máis de 3.000 millóns para consolidar as pensións
De confirmarse os datos adiantados hoxe o custe da desviación da inflación sobre o obxectivo marcado polo Banco Central Europeo (o 2%) sería de 3.024 millóns de euros, 1.512 millóns para pagar a desviación e outro tanto para consolidala.
O vicepresidente segundo e ministro de Economía, Pedro Solbes, xa advertira que a suba da inflación é a maior preocupación do executivo hoxe en día, xa que "non da sinais de que vaia remitir a curto prazo". O motivo, o de sempre, o prezo do petróleo que leva xa un mes sen baixar dos 90 dólares por barril.
Os pisos hipotecados baixan un 10%
Ademais, o mercado inmobiliario segue perdendo forza. No pasado setembro as vivendas hipotecadas en España eran un 10,39% menos que no mesmo mes do 2006, segundo os datos do INE, aínda que O prezo das hipotecas medrou un 3,45% nese mesmo período interanual.
O total do capital prestado para hipotecas foron 24,53 millóns de euros, un 8,4 por cento inferior con respecto a setembro de 2006.
29/11/2007
