Xeración Dixital

Os representantes do Bloque Nacionalista Galego votaron a última hora de onte en contra da reprobación á que foi sometida a Ministra de Fomento, Magdalena Álvarez, pola súa xestión na crise do AVE en Cataluña. O cambio de actitude dos nacionalistas, que onte se decantaban pola abstención, veu dado pola promesa do Goberno central de acelerar a transferencia de competencias e o pago da débeda social con Galicia "antes de que remate a lexislatura", segundo anunciou hoxe o vicepresidente da Xunta de Galicia, Anxo Quintana.

A falta de tres meses para que se convoquen eleccións xerais, o líder do BNG considera que se abre unha nova etapa nas relacións entre o Goberno galego e o estatal. Quintana argumentou o seu apoio ao Executivo de Zapatero afirmando que aínda que detectou "moitos motivos" para reprobar á titular de Fomento, finalmente "prevaleceron os intereses de Galicia" na decisión do partido. Asemade, amosouse fachendoso de que a comunidade "poña e quite ministras" igual que antes o facían Cataluña e o País Vasco.

Na votación de onte no Congreso pediron a dimisión de Magdalena Álvarez todas as forzas parlamentarias agás o PSOE, o PNV, o BNG, a Chunta Aragonesista e dous deputados que non acataron a disciplina de partido. O resultado final favoreceu á ministra por tan só tres votos de diferencia.

Traspaso de competencias antes das eleccións
O vicepresidente da Xunta apuntou hoxe en declaracións aos medios de comunicación que ten previsto reunirse co presidente José Luis Rodríguez Zapatero antes do 15 de decembro para abordar o traspaso competencial, para o que se creará unha Comisión Bipartita de Cooperación e se seguirá o documento asinado en febreiro co ex ministro de Administracións Públicas Jordi Sevilla, no que se fixaron sete competencias que pasarían a mans do Goberno galego e das que ata agora tan so se fixo efectiva unha.

A outra reunión anunciada hoxe e prevista para o luns é a convocatoria de todos os voceiros dos grupos parlamentarios galegos para "definir" o proxecto de lei co que reclamar desde o Parlamento autonómico o paso das competencias de tráfico e seguridade vial para Galicia. Preguntado pola posibilidade de que o Executivo central rexeite o traspaso dalgunhas áreas como salvamento marítimo, incluída no paquete pero diante da cal o goberno se manifestou recentemente en contra, Quintana advertiu que "por cada materia que non se traspase o Estado terá que poñer outra enriba da mesa".

Acelerar o pago da débeda histórica
Zapatero tamén se comprometeu a axilizar o pago da débeda histórica con Galicia en materia de servizo sociais, polo que antes do 15 de xaneiro asinará un protocolo para o pago de 51 millóns de euros. Quintana destacou que estas partidas contribuirán a poñer en marcha "proxectos pioneiros" como teléfono social 065 e o transporte adaptado para aquelas persoas con problemas de mobilidade.

O voceiro nacional do Bloque incidiu en que o acordo demostra que a súa formación "decide" en Madrid e agarda ter máis influencia no Congreso tras as próximas eleccións xerais. Nas últimas semana, a dirección nacionalista insistiu en que a súa intención é participar na gobernabilidade do Estado na vindeira lexislatura.

O PP acusa aos nacionalistas de "votar contra Galicia"
As críticas á actitude do Bloque na votación no Congreso escoitáronse hoxe desde o PPdeG a través do seu presidente, Alberto Núñez Feijóo, que acusou ao BNG de "venderse por un prato de lentellas" e considerou que a decisión dos nacionalistas demostra que queren máis presenza en Madrid "para votar contra Galicia".

Núñez Feijóo atribúe aos nacionalistas galegos a "responsabilidade" de que a ministra de Fomento siga "formalmente" no cargo a pesar de que a totalidade dos grupos parlamentarios no Congreso (PP, IU-ICV, ERC, CIU e Coalición Canaria) "entenden, como todos os españois" que Magdalena Álvarez "non está á altura das circunstancias, nin por eficacia nin pola súa falta de respecto constante".

A titular de Fomento é para o líder do PPdeG "a ministra que máis desprezou aos galegos", e lamentou que catro anos despois do acceso do PSOE ao poder a comunidade "estea onde sempre". Asemade, aproveitou para sinalar que aínda que a Comisión Bipartita se reúna, as transferencias de competencias "non se van facer" xa que a lexislatura "está rematada". "Van catro anos perdidos e non me digan que cando faltan 20 días van facer as cousas que non se fixeron ata agora", engadiu.

Pola súa parte, Quintana defendeuse das acusacións do PPdeG dicindo que o debate do Congreso era sobre unha situación en Cataluña e que a misión dos deputados da súa organización é "centrar o debate en Galicia". O potencial de decisión dos dous deputados do BNG no Congreso non foi empregado en función de "interese partidarios", asegurou, senón "para que Galicia saia gañando". A reprobación á Ministra de Fomento non tería, neste sentido, "ningunha utilidade práctica".