Xeración Dixital

Cinco científicos do Banco de Líneas Celulares de Granada, pioneiro na investigación médica con preembrións e liñas celulares preembrionarias, terán que comparecer ante os tribunais.

Segundo informa o xornal El Ideal de Granada, a citación xudicial prodúcese en virtude da demanda presentada por unha compostelá no xulgado de garda de Santiago na que expón teorías relativas á protección da vida que, ó seu entender, non son compatibles cos estudos con células nai que se desenvolven no devandito centro granadino.

Vista polo xuíz, a denuncia desembocou na apertura dunha investigación penal, a primeira que se pón en marcha sobre o traballo que os científicos do Banco de Líneas Celulares realizan neste eido da medicina. E non se trata de pesquisar sobre un suposto uso inaxeitado do material que sirve para a investigación á marxe da lexislación vixente, senón sobre o fondo ético da propia investigación.

A demanda, presentada por unha colaboradora da emisora Radio María, sae adiante segundo a súa autora "pola gloria de deus e por ter dado cun xuíz sensible e con conciencia". Segundo a denunciante, o traballo deste colectivo de científicos supón "un atentado en contra da vida".

Tras a estela do PP
Dende o plano político, o goberno do Partido Popular tentara frear xa a iniciativa andaluza coa interposición de varios recursos ante o Tribunal Constitucional, contra a investigación con células nai. Recursos que foron retirados máis tarde polo Goberno de Zapatero, cuxo Ministerio de Sanidade participa na financiación do centro.

Esta é a primeira vez que a iniciativa provén dun particular. A demandante solicita, ademais da comparecencia ante o xuíz dos científicos en calidade de imputados, a consignación no xulgado de artigos publicados por un investigador valenciano que apoia as teorías de anticonstitucionalidade.