Axencias (Santiago).
Catro internos do cárcere valenciano de Picassent retiveron durante doce horas a tres funcionarios da prisión. Os retidos foron liberados pouco a pouco sen que se producisen danos persoais nin fose necesario o uso da forza.
Os feitos comezaron no módulo de presos conflitivos do centro penitenciario, cando catro dos reclusos secuestraron ós funcionarios baixo ameazas con obxectos punzantes. Esixíanlle á dirección do centro que lles suministrase drogas e pílulas tranquilizantes, ademais de contacto co exterior. A idea de entregarlles drogas e somníferos foi desbotada a instancias dos servizos médicos, polo risco derivado para o desenlace do incidente.
Segundo fontes de Institucións Penitenciarias, os amotinados empregaran a outro preso como cebo para reter ós funcionarios, e confirmaron que un dos captores participara hai algúns anos na morte dun interno. A partir de entón, comezou un longo proceso de negociación no que participaron activamente os funcionarios retidos, así coma membros da unidade de apoio especializada da Garda Civil.
Liberación paso a paso
Eran as dez da noite cando o subdelegado do Goberno en Valencia, Luis Felipe Martínez, quen confirmou que non había feridos e que se tratara dun suceso localizado nunha zona concreta do centro, que na súa totalidade conta con preto de 2.800 reclusos.
Ó redor da media noite era liberado o primeiro dos funcionarios secuestrados, e soltaron ó segundo media hora despois. Pero as negociacións prolongáronse ata as seis da madrugada, cando o terceiro e último dos reféns abandonaba o módulo no que ficara retido durante case doce horas.
En virtude do sucedido, a Dirección Xeral de Institucións Penitenciarias ordenou o translado urxente dos catro reclusos implicados a outro establecemento carcerario.
Sete motíns en dez anos
Este é o sétimo motín que se produce nos cárceres do estado nos últimos dez anos. O máis grave deles rexistrouse en novembro de 1990 nunha prisión alacantina, cando un grupo de internos secuestrou a catro funcionarios e a dúas mestras. Durante a revolta faleceu un preso e outros dous resultaron feridos.
28/11/2007
