Xeración.
O líder político e ex axedrecista Garri Kasparov foi detido esta madrugada e condenado a cinco días de cárcere, xunto a outros activistas, por dirixir un acto de protesta en Moscú contra a política do presidente ruso, Vladimir Putin, a só unha semana das eleccións parlamentarias.
Kasparov, candidato ás eleccións presidenciais de marzo de 2008 do movemento A Outra Rusia, declarou que a sentenza contra el "non ten fundamento" e que é "inconcebible" que fose detido so por estar presente nunha manifestación autorizada e con 3.000 persoas. Ao ex campeón mundial de xadrez non se lle permitiu contactar cun avogado.
O líder de A Outra Rusia xa fora detido en outra ocasión, no pasado mes de maio durante o Cumio Rusia-Unión Europea en Samara.
CIncuenta detencións en San Petersburgo
Hoxe houbo tamén protestas en San Petersburgo, onde se celebrou outra manifestación
contra Putín, pero desta vez sen a autorización do Goberno. Varios centos de persoas, militantes de extrema esquerda vencellados ao partido do escritor Eduard Limonov, recibiron unha carga policial.
Cincuenta manifestantes foron detidos, entre eles o xefe da rama local do partido da oposición Yábloko, Maxim Reznik, e o candidato liberal ás vindeiras presidenciais, Boris Nemtsov.
Putin visitará maña San Peterburgo, a súa cidade natal, e non quere correr riscos cos manifestantes.
25/11/2007
