AGN.
A película alemá True North resultou hoxe gañadora do Gran Premio Calpurnia á Mellor Película do Festival de Cine de Ourense, dotado con 18.000 euros. Ademais, o director do filme, Steve Hudson, fíxose co Premio Calpurnia 'Carlos Velo' ao Mellor Director, cunha achega económica de 4.000 euros.
O xurado, composto por Manuel Pérez Paredes, Jorge Algora, Óscar Suárez, Nuno Filipe Cubal e Patricia Ferreira, valorou a película por "abordar cuestións tan próximas a Galicia como a crise do sector pesqueiro e as redes ilegais de tráfico de emigrantes", a través dun guión "tan realista como conmovedor". Do labor de Hudson destacou a "excelente dirección de actores", así como a "difícil posta en escena no interior dun barco".
O xurado concedeu por unanimidade o Premio Especial, dotado con 1.500 euros, á húngara A viaxe de Iszka, porque "fala da descarnada historia dunha infancia amputada, da perda dos valores fundamentais e das secuelas do liberalismo salvaxe nos países do leste de Europa". Ao tempo, subliña o "forte compromiso social" da selección de películas a concurso.
No apartado de interpretación, os premios recaeron en Hermila Guedes, por El cielo de Suely, e en Eberhard Kirchberg, por Alle Alle, papel no que constrúe un personaxe "especialmente entrañable, cunha sutil economía de recursos xestuais".
Fin de festa
Coa entrega de galardóns clausúrase a XII edición do Festival de Cine Internacional de Ourense, ao que hoxe asistiu o vicepresidente da Xunta, Anxo Quintana, quen salientou que o sector audiovisual galego debe apostar pola "difusión da identidade propia" e ter ao tempo unha "mirada aberta que o permita reinventarse". Asemade, comparou o sector co propio Festival, cunha mirada propia e aberta".
Quintana louvou a aposta pola innovación realizada polo festival este ano, e salientou non só a exhibición interactiva das obras audiovisuais, senón tamén o novo formato dunha plataforma de intercambio e reflexión entre profesionais e institucións.
Sección documental
Na sección competitiva de documental, a XII edición do Festival de Ourense premiou Skyggenes Dal, de Morvary Samaré e Astrid Schau-Larsen, polo tratamento dun tema "enormemente conflitivo" como o abuso sexual infantil, realizado con "sutileza e respecto". A cinta levou 2.000 euros como galardón.
O xurado, composto por David Blaustein, Alberte Pagán e Pablo García, tamén distinguiu o labor do director Driss Deiback, polo documental Los perdedores, onde "redescobre un tema negado e esquecido na guerra civil española". A mención especial foi para Heavy Water: a film for Chernobyl, de David Bickerstaff e Phil Grabsky, que inserta o "devir persoal" no contexto histórico-social da traxedia de Chernobyl cunha "sabia e poética montaxe" con imaxes preexistentes.
Sección curtametraxes
A galega Temporada 92/93, de Alejandro Marzoa, levou o Premio á Mellor Curtametraxe Galego-Portuguesa Eixo Atlántico, dotado con 1.500 euros, e outra produción galega, Bechos raros, foi honrada cunha mención especial no apartado de guión.
O xurado do apartado de curtas, composto por Tim Redford, Comba Campoy e Alfonso Pato, outorgou o premio á mellor curtametraxe á eslovaca Tricko, the t-shirt, por "amosar dun xeito contundente, a través dun guión eficaz e duns actores solventes, un conflito tan presente na sociedade occidental como a intolerancia entre culturas".
O premio á mellor dirección foi para o británico Simon Ellis, por Soft. Como mellor actor e actriz, distinguiuse o labor de Natalia Dicenta por Propiedad Privada e de Jimmy Lindstrom, pola curta sueca Berusningstudiem.
24/11/2007
