Xeración Dixital

O debate sobre o control dos contidos en internet e os lindes da liberdade de expresión chegan a Turquía. O Goberno emprendeu a vixilancia das informacións publicadas na rede co obxectivo de previr posibles crimes. Sen embargo, hai quen dubida da boa vontade gobernamental, e moitas organizacións de xornalistas puxeron xa o berro no ceo. Pensan que a nova lei vai ser aproveitada para o exercicio da censura.

Nesta liña, a disposición legal recentemente introducida establece que oito potenciais delitos poden estar estreitamente vixiados: os crimes contra Mustafa Kemal 'Atatürk', fundador da Turquía moderna, o abuso sexual de menores, o uso e promoción de drogas, propagar mercadorías que perxudiquen a saúde, contidos obscenos, prostitución e os xogos de azar.

A liberdade de expresión como linde
Para previr o acceso a páxinas web deste tipo requírese dunha resolución xudicial, se ben a fiscalía pode decretar a prohibición pola súa conta en casos de emerxencia. Dende as asociacións de xornalistas queren deixar un matiz claro: unha cousa é retirar dunha páxina material que puidese ser obxecto de delito, e outra moi distinta é pechar a web. Consideran que esta última decisión violaría o dereito á liberdade de expresión.

Pola súa banda, dende o Consello de Telecomunicacións aseguran que o cumprimento da lei non se baseará nas súas propias decisións, senón en criterios de alcance internacional. E que, en ningún caso, esas medidas se chamarán censura.