Axencias (Santiago).
O Líbano non escollerá presidente ata o vindeiro 30 de novembro. A asemblea que tiña que celebrarse hoxe foi aprazada, despois de non conseguir un acordo para sustituír ó actual xefe de Estado, Emile Lahud, cuxo mandato expira mañá.
O presidente do Parlamento libanés, Nabih Berri, decidiu o aprazamento excepcional "para permitir consultas adicionais que permitan un consenso para a elección dun presidente". A escolla do futuro mandatario traduciuse nunha crise tanto para o país coma para Occidente, que ve moi lonxe as posibilidades do acordo.
Este xoves, os ministros de Exteriores de Francia, Italia e España coincidían ó sinalar que no Líbano tería que producirse "un milagre" que permita a elección antes de que se esgote o prazo constitucional.
Proposta 'in extremis'
Os deputados da maioría reuníronse pola vía da urxencia para estudar a última proposta do líder cristián Michel Aoun: a candidatura de Pierre Daccache e o reparto equitativo dos escanos parlamentarios e dos ministerios importantes. A moción foi rexeitada por "anticonstitucional".
Nunha tentativa de conseguir un candidato consensuado, Aoun propuña a escolla dun presidente que non fose do seu grupo, mentres a oposición fai o propio cun primeiro ministro que non proceda das súas filas. O plan completábase coa idea de que o presidente ficase no cargo unicamente dous anos, ata a celebración de eleccións municipais, fronte ós seis actuais que establece a Constitución.
A proposta do líder cristián foi rexeitada polas Forzas do 14 de marzo, a coalición antisiria que é maioritaria na lexislatura. Precisamente esta coalición que conta con 68 dos 127 asentos no Parlamento, ameazou cunha votación por maioría simple se non se acada un consenso.
23/11/2007
