Axencias (Santiago).
A causa aberta en relación co accidente do avión Yak-42 polas irregularidades durante a identificación dos cadáveres foi arquivada. O xuíz da Audiencia Nacional Fernando Grande-Marlaska adoptou esta decisión nun auto no que explica que, pese a tratarse dunha conduta grave, os feitos non encaixan no delito de falsidade documental e non revisten "relevancia penal".
Aínda así, deixa aberta a vía para que os afectados esixan responsabilidades por outras vías que non sexan a do penal.
Co arquivo das dilixencias, o xuíz pecha a investigación sobre o accidente aéreo no que morreron 62 militares españoles. En agosto sobreseeuse definitivamente a parte da investigación relacionada coa contratación do avión.
Os feitos
O accidente do Yak-42 produciuse o 26 de maio do 2003 en Turquía. Nel perderon a vida 62 militares españoles que volvían de cumprir misión en Afganistán. Foi o sinistro que máis vítimas tivo nas Forzas Armadas no tempo de paz, e as identificacións dos cadáveres realizaronse en pouco máis dun día. Correron a cargo dun equipo forense enviado polo Ministerio de Defensa, que daquela dirixía o popular Federico Trillo.
22/11/2007
