AGN.
Hoxe comezan a cobrarse en toda España os 2.500 euros por fillo prometidos polo goberno de Zapatero, e 6.859 familias galegas cursaron xa solicitude para esta axuda. En todo o estado son 142.331 os que notificaron nacementos ou adopcións para optar a ela.
Galicia é a quinta comunidade con máis nacementos ou adopcións, por detrás de Andalucía (xunto con Ceuta e Melilla), con 28.563; Cataluña, con 25.124; Madrid, 19.687; e Valencia, con 15.749. Así, ocupa a mesma situación que lle corresponde por poboación, na que tamén está por detrás das autonomías citadas.
55.000 abonos nun mes, 120.000 ata final de ano.
Segundo informa o Ministerio de Economía de aquí a finais de mes abonaranse as 55.000 primeiras solicitudes. A previsión é que a final de ano 120.000 familias xa recibirían este pago, do total de 142.331 que comunicaron o nacemento ou adopción dun fillo ata onte mesmo, 19 de novembro.
A partir de 2008, a Axencia Tributaria pagará a axuda nuns 30 días desde o momento da solicitude. Trátase dun único pago de 2.500 euros por cada fillo ou adopción no territorio español producido a partir do día 1 de xullo de 2007, como dedución do IRPF ou como prestación económica non contributiva.
A beneficiaria con carácter xeral desta axuda será a nai, aínda que tamén poderá selo o pai cando haxa unha cesión do dereito ao cobro, ou en caso de falecemento da nai. En todo caso, é necesario que o beneficiario, tanto español como estranxeiro, resida de forma legal, efectiva e continuada en territorio español os dous anos inmediatamente anteriores ao nacemento ou adopción.
As novas solicitudes para o "cheque" poderán presentarse con firma electrónica na web da Axencia Tributaria, nas oficinas deste organismo, ou a través do teléfono 901 200 345.
20/11/2007
