Xeración/Axencias.
O autor barcelonés Francesc Capdevila, 'Max', gañou o primeiro Premio Nacional de Cómic, pola súa obra Hechos, dichos, ocurrencias y andanzas de Bardín el Superralista. Como finalista do premio quedou o autor ourensán David Rubín, con La tetería del oso malayo.
O galardón, concedido polo Ministerio de Cultura, ten unha dotación económica de 15.000 euros e pretende "distinguir a mellor obra de banda deseñada dun autor español", publicada en calquera das linguas oficiais do estado durante o último ano.
Max, nacido en Barcelona en 1956, non para de colleitar premios con Bardín. Na pasada edición do Saló do Cómic de Barcelona, a súa obra conseguiu os premios á mellor obra de 2006, ao mellor debuxo e ao mellor guión. No Sálo, Rubín fíxose co premio Josep Toutain ao mellor autor revelación de 2006.
'Obra cegadora'
O xurado destacou do traballo galardoado o ser "unha obra graficamente cegadora, cun guión orixinal e repleta de referencias literarias, filosóficas e profesionais". Considerou ademais que Max chega con esta obra "ao cumio da súa dilatada traxectoria profesional, cun cómic que marca un antes e un despois na historieta española".
O xurado, presidido polo director xeral do Libro, Rogelio Blanco, estivo composto por Pedro López, Laura Pérez, Eloy Rubio, Antonio Guiral, Carmen Olivié, Ana Miralles, Federico Moreno, Carles Santamaría e Társila Peñarrubia.
19/11/2007
