Xeración (Santiago).
"Só onde sexa posible". Con esta apostilla rómpese o compromiso de reserva do 40% do solo para vivenda protexida feito polo alcalde de Vigo, Abel Caballero. A pretensión, contemplada incluso no pacto de goberno entre PSOE e BNG, non é viable.
O rexedor vigués recoñeceu que "se nalgún ámbito non é rentable, non se poderá facer; a lei non o permite, e por iso se puxo no seu día a cláusula de que se inclúa en tódolos ámbitos nos que sexa posible".
Xa en setembro, a concelleira de Urbanismo comunicou as modificacións a incluír no documento ó equipo encargado da redacción do texto, Consultora Galega. No primeiro punto rezaba: "Inclusión do 40% de vivenda protexida en tódolos ámbitos do SUNC -Solo Urbano Consolidado- e Suble -Solo Urbanizable- nos que resulte posible".
Obrigas
No apartado destinado ás obrigas do contratista, neste caso da Consultora Galega, o texto atribúelle a misión de estudar a posibilidade de introducir a reserva do 40% de vivenda protexida en tódolos ámbitos. Polo tanto, na práctica non se descarta que a porcentaxe apareza nos 409 ámbitos nos que o Plan Xeral divide á cidade olívica, sempre que os redactores estimen e argumenten no documento que é posible facelo.
Nesta liña, Abel Caballero e o tenende de alcalde nacionalista, Santiago Domínguez, escenificaron a entrega oficial do informe do equipo de redacción cos cambios introducidos. A reunión serviu para fixar un primeiro calendario de tramitación do PXOM, co obxectivo de que estea aprobado a finais de ano.
Tese nacionalista
O cambio supón un xiro radical nas pretensións do rexedor vigués, que hai un mes insistía en que a reserva do 40% era un obxectivo "irrenunciable". A postura relaxárase nos últimos días, despois de que Caballero deixase unha porta aberta ás teses do seu socio no goberno, o BNG. Os nacionalistas defendían que a medida se aplicase unicamente naqueles ámbitos nos que fose posible.
E así será finalmente. Sen embargo, nin o alcalde nin o tenente de alcalde quixeron aclarar cales son os ámbitos nos que se aplicará a reserva de solo para pisos protexidos.
Os cambios introducidos no documento do PXOM irán a pleno "en quince ou vinte días", segundo indicou Caballero. Unha vez aprobado, tería que ser revisado e correxido aínda polos técnicos da Consellería de Política Territorial.
E sete anos despois...
O Plan de Urbanismo vigués comezou a súa tramitación no 2000, durante o mandato do nacionalista Lois Pérez Castrillo. A redacción do texto ficaba concluída ó gume das eleccións do 2003.
O documento pasou despois polas mans de Ventura Pérez Mariño e de Corina Porro, a quen a Xunta lle denegou o visto bo por cuestionar a súa adaptacións ás normas medioambientais e unha previsión de crecemento considerada excesiva dende Política Territorial, entre outros argumentos.
Coa súa chegada ó poder, Caballero asegurou que o correxiría para que fose aprobado neste mesmo ano, pero dende aquela o PXOM vigués aínda deu unhas cantas reviravoltas. Na actualidade, unicamente uns 15 municipios galegos contan cun plan urbanístico aprobado e adaptado á normativa do 2002.
19/11/2007
