Xeración Dixital

A ministra de Agricultura, Pesta e Alimentación, a galega Elena Espinosa declarou que non é probable que se poidan dar máis axudas aos armadores para paliar as perdas que lles está a causar a suba dos combustibles.

Nunha rolda de prensa en Vigo, con motivo da presentación do Libro Branco da Pesca, a titular estatal de Agricultura incidiu en que este tipo de axudas públicas as outorgan os gobernos sobre uns orzamentos que saen dos impostos de todos os cidadáns e lembrou que o aumento do prezo dos combustibles tamén lles afecta a outros sectores económicos e aos cidadáns de a pé.

Con todo, deixou unha porta aberta para a negociación co sector, que xa anunciou mobilizacións. Espinosa asegurou que se reunirá cos armadores e que "sempre tiveron abertas as portas do Ministerio".

Cota láctea
A ministra de Agricultura referiuse tamén ao Plan Lácteo ao ratificar a súa intención de agardar a que exista un documento definitivo da UE no que se fixe a cota correspondente a España para iniciar o Plan de Reestruturación Láctea. Con todo, declarou que, mentres, si se poderá iniciar o Plan de Abandono.

Espinosa sinalou que o seu departamento proporá ás comunidades autónomas "a posibilidade da apertura" do Plan de Abandono, que sería a primeira fase do Plan de Reestruturación. Con todo, considerou que ata que a UE fixe a cota para o vindeiro ano "non sería sensato" continuar co Plan.

Neste senso, a titular estatal de Agricultura declarou que existe un primeiro documento, no que a UE prevé un incremento de cota do 2%, pero que aínda non é o definitivo.

Incorporar o I+D á pesca
Durante a presentación do Libro Branco da Pesca, Espinosa destacou a necesidade de incorporar as novas tecnoloxías ao sector pesqueiro como un dos pasos necesarios para garantir a súa supervivencia. Esta necesidade queda constatada, segundo a ministra, no Libro Branco, elaborado de xeito consensuado entre administracións pesqueiras, expertos independentes, representantes do sector, sindicatos e ONGs.

Espinosa demandou novas modalidades de formación para os traballadores do mar que acheguen a oferta e a demanda á realidade do sector pesqueiro, pediu impulsar a diversificación económica e as políticas de I+D