Xeración Dixital

A empresa Ferroatlántica podería enfrontar dúas multas de ata 300.000 euros cada unha e incluso perder a concesión do encoro da Fervenza, no Río Xallas, a causa da morte masiva dos peixes da presa ao quedar practicamente seca hai unha semana.

A Consellería de Medio Ambiente abriulle a Ferroatlántica dous expedientes sancionadores polo baleirado do encoro que provocou a morte de máis de mil peixes no río Xallas. Segundo as investigacións do departamento autonómico, poderíanselle impor á empresa dúas sancións, unha das cales de tipo moi grave por incumprimento da Lei de Pesca Fluvial de Galicia. A normativa vixente fixa a contía desta infracción entre 60.000 a 300.000 euros.

O outro expediente foi aberto por Augas de Galicia pola mala xestión do encoro e a realización de obras no mesmo sen dispor dos permisos pertinentes. As contías das sancións neste caso sitúanse entre os 30.000 e os 300.000 euros.

Medio Ambiente sinala ademais que, a partir da situación provocada no encoro da Fervenza, é posible retirarllle a Ferroatlántica a xestión do embalse, pese a que non cre probable que iso chegue a suceder.

"Xestión pésima"
O conselleiro de Medio Ambiente, Manuel Vázquez, calificou de "pésima" a xestión da presa, que comparou coa do resto dos embalses galegos, nos que non está a haber problemas nos ecosistemas fluviais.

Sobre o sucedido no Xallas, Vázquez sinalou que un día antes do vaciado da presa, axentes de conservación da natureza advertiron a Ferroatlántica de que debería reducir o caudal ecolóxico polo baixo nivel que presentaba a presa. Medio Ambiente acusa á empresa de non ter en conta este aviso e seguir soltando "un caudal inaxeitado".

Estes mesmos axentes constataron tamén que se estaban a facer obras sen permiso dentro do embalse, cando xa fora baleirado. Lembrou o titular de Medio Ambiente, ademais, que o permiso de explotación do embalse sinala que é obrigatorio comunicar cun mes de antelación a Aguas de Galicia que o nivel da presa baixa do 20%. Indicou que neste caso, a comunicación se produciu un día antes da morte masiva dos peixes do Xallas.