Xeración Dixital

Satisfeito por ter sido un presidente independente nunha lexislatura difícil. Así marcha da vida política o presidende do Congreso dos Deputados, Manuel Marín. O histórico socialista anunciou a súa retirada nunha rolda de prensa pronunciada dende Ciudad Real, a provincia na que noutrora fora escollido.

Así as cousas, canda o remate da lexislatura concluirá o seu paso pola política activa. Segundo indicou, a partir de entón vai empregar o seu tempo na loita contra o cambio climático no ámbito universitario, e a defender a necesidade de construír un modelo de desenvolvemento sostible e renovable.

Trala súa experiencia á fronte do Congreso dos Deputados, Manuel Marín encarará agora este novo reto. Recoñeceu que o cambio climático é un asunto que lle preocupa dende hai tempo. E engadiu que tivo "a sorte" de pasar un día con Al Gore durante a entrega do Premio Príncipe de Asturias ó ex vicepresidente dos Estados Unidos, encontro que alimentou as súas preocupacións.

O posto, nas mans do partido
Con esta noticia, adiantada ó PSOE e feita pública este mediodía, Marín deixa clara a súa intención de non repetir como deputado por Ciudad Real de cara ás vindeiras eleccións, como lle ofrecera o presidente de Castilla la Mancha, José María Barreda. E coloca o seu cargo á disposición do PSOE, dentro dun proceso de listas que comeza o vindeiro sábado.

O presidente do Congreso marcha sen cumplir a súa promesa de remodelar a Cámara, pola falta dun consenso entre populares e socialistas. Pero si que acometeu reformas tecnolóxicas, coma a modernización da loxística parlamentaria e a posta á disposición dos deputados de novos postos informáticos.

Marín non compite
Hai uns meses comezou a barallarse o nome de José Bono como posible candidato socialista á presidencia das Cortes, no caso dunha victoria do partido. Daquela, Marín anunciara xa que non estaba disposto a competir por ningún posto unha vez pechada a lexislatura.

"Estou aquí para que me queiran, e non para pelexar nin competir", asegurou nunha rolda de prensa concedida o pasado xullo. E completou a súa sentenza asegurando que xa non atravesa esa situación persoal e que cunha lexislatura na Presidencia do Congreso xa tivera "bastante".