Xeración Dixital

O ministro do Interior, Alfredo Pérez Rubalcaba, relacionou con "grupos independentistas radicais e violentos" a colocación do artefacto explosivo que esta madrugada estourou no concello pontevedrés de Cangas.

Respecto da cantidade e do tipo de explosivo empregado, Rubalcaba asegurou que ámbolos dous datos están aínda sen confirmar. Aínda así, as primeiras hipóteses dos expertos na investigación apuntan a que o artefacto que estoupou se compoñía de entre 4 e 5 quilos de cloratita, á vista dos danos materiais que provocou a honda expansiva da explosión. A cloratita é unha aleación de clorato potásico, xofre e azucre que permite unha fabricación caseira.

Presisamente á fabricación caseira do artefacto referiuse o delegado do Goberno en Galicia, Manuel Ameijeiras. Nesta liña, confirmou que o cheiro a pólvora no lugar da explosión e os cuantiosos danos fan pensar "nun artefacto composto de cloratita". De tódolos xeitos, o delegado do Goberno pediu "paciencia", ata que se coñezan os resultados oficiais da investigación.

Dúas liñas de investigación
Polo de agora, a Garda Civil mantén abertas dúas liñas de investigación sobre a autoría do artefacto explosivo. Non se descarta por agora que a explosión obedeza a un atraque contra o dono da inmobiliaria por "motivos persoais do ámbito laboral".

A hipótese con máis forza apunta a que detrás da autoría estea "un grupo independentista violento". Con todo, fontes da Garda Civil aseguran que existen algunhas diferenzas respecto aos outros ataques atribuídos ao grupo Resistencia Galega: na parroquia da Ramallosa en Teo, en Nigrán e en Cangas.

Os feitos
A bomba estourou esta madrugada fronte a unha inmboliliaria en Cangas, no barrio do Forte. Non houbo feridos, aínda que se produciron importantes danos materiais, segundo informou a Policía Local. O suceso ocorreu cara as 2.25 da noite, a cen metros da sé do Concello.

"Había gran cantidade de fiestras rotas das casas adxacentes e portas rebentadas", explicou a Policía Local. Ademais, o local da empresa inmobiliaria quedou totalmente destruído. Despois de comprobar a gravidade, a policía desaloxou ós veciños do edificio durante a noite, se ben puideron regresar ás súas casas esta mesma mañá.

A segunda bomba, trala pota a presión
É o segundo artefacto explosivo que se atopa no municipio de Cangas en seis meses. O 9 de maio, a Garda Civil inutilizou outra bomba atopada dentro dunha pota a presión, fronte a un solar en construcción do lugar de Darbo.

Daquela, a carón da pota atopárase unha nota que reivindicaba a autoría do grupo Resistencia Galega, que a finais de marzo xa empregara un método similar nunha obra na parroquia da Ramallosa, no municipio pontevedrés de Nigrán.