Xeración Dixital

Os socios de Goberno, PSdeG e BNG, teñen claras as súas diferenzas á hora de reformar o voto emigrante: o problema está nas autonómicas. Mentres, o PPdeG segue próximo á postura dos socialistas, xa que rexeitan de plano limitar o voto dos emigrantes máis aló das eleccións municipais, fronte aos nacionalistas que queren eliminalo nas autonómicas.

O portavoz parlamentario do BNG, Carlos Aymerich, insta a eliminar o voto exterior para as eleccións municipais e as autonómicas, ademais de limitalo nas xerais e europeas. O PSdeG afirma que "non está disposto" a limitar este dereito ao voto máis aló das locais, segundo constatou o seu portavoz Ismael Rego, nunha postura moi similar á manifestada polo deputado popular Aurelio Miras Portugal.

Os tres partidos celebraron esta tarde a segunda reunión para avanzar nunha proposta conxunta de reforma da Lei Orgánica do Réxime Electoral Xeral (LOREG). O único que se constatou neste novo encontro é que segue habendo "diferentes posicións", segundo recoñeceu o propio conselleiro de Presidencia, José Luís Méndez Romeu, quen volveu presidir a xuntanza. Recoñeceu que esta fase de presentar propostas vai durar un tempo, pero confía en que "produza froitos".

Dentro de quince días, PSdeG e PP comprometéronse a levar os seus textos articulados da proposición de lei que posteriormente se presentará no Congreso para o seu debate e votación. O BNG ten sobre a mesa a súa proposta xa elaborada e anunciada, pondo de manifesto que "non imos a apoiar unha reforma da LOREG que só sexa para o voto en urna", a cuestión que socialistas e populares sitúan como fundamental.

"Reducionismo dos comicios autonómicos"
Aymerich insistiu en que o BNG quere que se aborde nesta reforma "quen debe votar, en que eleccións e como", e estas tres cuestións teñen para os nacionalistas "o mesmo rango". Rego, pola súa parte, xa advertiu de que o PSdeG non está polo labor de "limitar dereitos dos cidadáns que teñen nacionalidade española" e instou a volver ao "punto de encontro" que se estableceu respecto diso na proposta de reforma do Estatuto de Galicia.

Ademais, instou ao BNG a explicar por que quere manter o voto da emigración, aínda que con limitacións, para as xerais e non para as autonómicas. Considera que isto é un "reducionismo" dos comicios galegos coma se se considerasen "menos políticos" que os estatais.

O deputado do PPdeG Aurelio Miras Portugal tamén rexeitou calquera proposición de lei para o Congreso que "trate de recurtar os dereitos", non só dos emigrantes, senón da propia comunidade autónoma. Así, insistiu en que computen os galegos no exterior, para todos os efectos, tanto a nivel electoral, para determinar o número de escanos, como para os recursos económicos.

"A todos os efectos"
Este punto parece un dos poucos nos que non hai diferenzas entre os tres grupos, xa que é unha cuestión que tamén leva o Bloque na súa proposta: a reclamación de que os emigrantes "conten a todos os efectos".

Outro aspecto no que hai consenso de partida é na necesidade de depurar o Censo Español de Residentes no Estranxeiro (CERE) para que nas próximas eleccións xerais de 2008 "non se repita o espectáculo das municipais" co voto emigrante, segundo Aymerich.