LV.
No medio da tristura pola derrota ante o Racing, o Deportivo e o deportivismo volveu sorrir. Juan Carlos Valerón participou onte na pachanga do adestramento por primeira vez desde a operación de xeonllo á que foi sometido o pasado mes de marzo.
O xogador canario compartiu o partidiño cos futbolistas que non xogaron de inicio no encontro co Racing, e utilizou o peto amarelo, o que viste o futbolista comodín que sempre xoga co equipo que ten o balón no seu poder e que desta vez serviu tamén para protexer o mediapunta canario.
Para evitar sustos, o corpo técnico do Deportivo tomou precaucións e Valerón gozou de inmunidade co balón nos seus pés porque ningún contrario podía facerlle entradas que supuxesen algún risco para o danado xeonllo do internacional español. “Ata o de agora non fixera nada con intensidade e necesito ir vendo as sensacións, aínda que é cedo aínda”, comentou o centrocampista de Arguineguín logo do adestramento.
Estará plenamente recuperado en xaneiro
“Estou contento, pero ía un pouco a cámara lenta”, engadiu a estrela branquiazul, que no verán marcou como obxectivo poder estar a disposición de Lotina a partir de xaneiro do próximo ano, aínda que agora non quere fixar prazos. Se o xeonllo do mediapunta responde, comezará a terceira e definitiva fase da súa recuperación para acabar co inferno que iniciou
o 22 de xaneiro de 2006, cando rompeu o ligamento cruzado anterior do xeonllo esquerdo ante o Mallorca. Na pretemporada, tras recuperarse, volveu caer mancado e volveu pasar polo quirófano.
Tras outra reaparición, en marzo visitou o quirófano por terceira vez en pouco máis dun ano. Agora, as súas sensacións determinarán se volve ou non competir. O deportivismo espérao cos brazos abertos.
13/11/2007
