Xeración Dixital

Ás veces, a luz do sol só deita preguntas. Seica case medio cento de avións, na súa maioría militares, cruzaron o espazo aéreo español en dirección ou de volta da base estadounidense de Guantánamo en Cuba: ¿U-la información no Congreso dos Deputados? O rei increpa a Chávez e ficamos enlamados nas formas: ¿Cal e o papel político do estado e, sobre todo, das empresas españolas en América do sur? ¿É este espectáculo teatral a escenificación dun problema máis grave de reminiscencias coloniais?

Un rapaz morre nun enfrontamento entre colectivos antifascistas e membros do partido Democracia Nacional que se ían concentrar en Madrid baixo o lema Contra el racismo antiespañol, contra la inmigración: ¿Por que a Delegación do Goberno autoriza manifestacións de partidos de ultradereita? Sucédense as agresións en centros escolares e a súa posterior gravación e difusión na rede. As televisións pagan aos nenos por emitir as imaxes vexatorias unha e outra vez en horarios de máxima audiencia: ¿ninguén vai penalizar ás televisións e ninguén vai denunciar a carencia de educación ética non só nas escolas senón tamén nas familias?

A cesta da compra non para de se disparar. As hipotecas non descenden e o endebedamento familiar acada cotas preocupantes: ¿os consumidores continuaremos indefensos ante as subas terribles en produtos básicos de consumo?

Cinco anos van aló da traxedia do Prestige e os máximos titulares aos que podemos aspirar son “temos máis medios”. ¿Non oíron aínda a voz cidadá que esixe máis competencias e un afastamento do corredor atlántico que evite que se repita unha nova catástrofe ecolóxica nas nosas costas? Ás veces, a luz do sol prefire non darnos respostas.