Xeración.
As autoridades paquistanís ordenaron o arresto domiciliario da líder da oposición, Benazir Bhutto, para impedirlle participar na 'larga marcha' contra o estado de excepción, convocada para mañá e que tiña previsto liderar.
O arresto da ex-primeira ministra de Paquistán está previsto en principio para sete días. Horas antes de dictar a orde de reter a Bhutto no seu domincilio, as autoridades do país prohibiran a protesta convocada para mañá en Lahore. Ademais da protesta contra o estado de excepción e o goberno de Musharraf, a manifestación ía supoñer o 'pistoletazo' de saída á campaña do Partido Popular do Paquistán (PPP), liderado por Bhutto, de cara ás lexislativas.
''Motivos de seguridade''
A detención da líder da oposición obedece, segundo o goberno do país a "motivos de seguridade", causados polo temor a que se produza un atentado durante a manifestación. Esta mesma razón foi a esgrimida a pasada semana para reter a Bhutto no seu domicilio e impedirlle asistir a outra manifestación en Islamabad.
Pese a que daquela Bhutto tentou romper en dúas ocasións, non o conseguiu e a protesta, que tivo lugar sen ela, foi violentamente reprimida pola policía. Nada máis levantarse a orde de arresto, a líder do PPP asistiu a outra manifestación, esta vez de xornalistas.
Islamabad escúdase na situación convulsa que vive o país e argumenta que, nestas circunstancias, podería repetirse un atentado dirixido contra a líder da oposición, como o que o pasado 18 de outubro matou a 139 persoas, e do que Bhutto saiu ilesa.
Bhutto contra o estado de excepción
O estado de excepción continúa activado en Paquistán, dende que hai máis dunha semana Musharraf anunciase esta medida xustificándoa na "insurrección islámica e a interferencia coa Xustiza". Pese a que o presidente paquistaní deu un paso atrás ante as protestas e decidiu convocar eleccións, tanto presidenciais como lexislativas, tentando apagar as críticas, estas non cesaron.
Musharraf enfróntase a numerosas voces acusadoras que consideran que o estado de excepción obedece a un movemento para perpetuarse no poder. Ademais, a situación actual deixa tamén nun limbo o acordo acadado entre Musharraf e Bhutto, pola cal o presidente aceptou anular os cargos de corrupción que pesaban sobre a primeira ministra. Así, ela podería regresar ao país e concorrer aos comicios como líder da oposción tras 18 anos no exilio.
Tralo 'autogolpe' de Musharraf, o que parecían relacións cordiais con Bhutto tornáronse de novo conflitivas, e a ex-primeira ministra está a desafiar o estado de excepción, situándose á bandeira das protestas.
12/11/2007
