Xeración /Axencias.
O embalse da Fervenza, o meirande da provincia da Coruña, recuperou apenas dous metros de auga nun día, logo de vaciarse por completo. A seca do embalse causou a morte de milleiros de peixes, case todos troitas e escalos. Medio Ambiente abrirá unha investigación á empresa Ferroatlántica, xestora do embalse, para determinar o sucedido.
O panorama era dantesco: peixes mortos ou agonizantes pola falta de osíxeno enchían o solo do embalse, medio sumerxidos nalgo que era máis lodo que auga. Foi o que se atoparon os técnicos de Medio Ambiente ao chegar o sábado ata o embalse da Fervenza. Augas de Galicia ordenou pechar as comportas para que subise o caudal de auga.
Segundo informou Medio Ambiente, ao subir un pouco o nivel de auga, as troitas que aínda quedaban vivas "conseguiron sair río abaixo, o mesmo que as que estaban no río morrendo porque só recibían lama da presa".
Ferroatlántica terá que dar explicacións
A seca dos últimos meses leva a culpa do descenso do nivel de auga no embalse da Fervenza. Con todo, dende Medio Ambiente puntualizan que "unha cousa é que baixe o nivel e outra que seque". Apuntan a un posible "fallo no sistema de explotación", argumentando que "se ao cerrar as comportas o nivel de auga sobe dous metros, o embalse non secou porque non chegase auga, senón porque se soltou demasiada".
O conselleiro de Medio Ambiente, que visitou a zona, manifestou que, como xestora da presa, "Ferroatlántica terá que explicar cal é a situación e por qué decidiu abrir a auga" ata que o embalse quedou practicamente baleiro. A Consellería abrirá unha investigación á empresa, para esclarecer se tivo responsabilidades nun hipotético delito medioambiental no Xallas.
A máis grande, a primeira en secar
A presa da Fervenza embalsa o río Xallas entre os concellos de Dumbría, Zas e Mazaricos. Trátase da meirande extensión de auga doce da provincia da Coruña, 104 millóns de metros cúbicos cando o embalse está a plena capacidade.
Por qué a meirande presa da provincia é a primeira en secar é algo que terá pois que explicar Ferroatlántica. Pese a que dende Medio Ambiente non avanzan hipóteses, a sombra da neglixencia planea sobre a empresa. Técnicos da Consellería traballan na zona para rescatar o meirande número de peixes posibles, ao tempo que recollen os mortos. Polo de agora non se avanzou un número, pero fálase de milleiros de troitas mortas precisamente durante a época de desove.
11/11/2007
