Xeración /Axencias.
Un artefacto explosivo colocado xunto aos Xulgados da localidade biscaína de Getxo foi desactivado pola Ertzaintza na mañá do domingo. Segundo confirmou o departamento vasco de Interior, o artefacto contiña cinco quilos de cloratita. Durante a tarde, as forzas de seguridade desactivaron un segundo explosivo con outros tres quilos de cloratita.
Un aviso anónimo deu a alerta pasadas as seis da mañá da colocación de explosivos xunto aos Xulgados de Getxo. Unha chamada telefónica a SOS Deiak, feita en nome de ETA, avisaba do lugar onde estaba colocado o artefacto que, segundo afirmou, faría explosión en media hora.
Efectivos da Policía Autónoma Vasca acordonaron a zona e localizaron unha mochila colocada xunto ao edificio dos Xulgados de Getxo. Na bolsa atopábase unha pota que, ademais dos cinco quilos de cloratita contiña un temporizador e un cordón detonante. A Unidade de Desactivación de Explosivos da Ertzaintza desactivou o artefacto antes de que estoupara.
Durante a tarde foi localizado un segundo explosivo, da mesma composición e menor tamaño, que tamén foi desactivado polos técnicos da Ertzaintza.
11/11/2007
