Xeración.
Continúa a maldición do Racing na Malata. Os ferroláns volven fallar na casa e escápanlle outros tres puntos ante o Nástic. Con dous tantos na segunda metade, o equipo tarraconense sentenciou o encontro en Ferrol.
O equipo de Juan Veiga leva sen gañar na casa dende o 9 de setembro, e o partido de hoxe non se presentaba sinxelo. O Gimnástic de Tarragona, o terceiro recén descendido ao que se enfrontan os ferroláns, prometía non poñerlle as cousas fáciles.
A sentenza, na segunda parte
O Racing desaproveitou varias ocasións na primeira parte que terían sido claves para conseguir un final ben distinto. Trala volta do descanso, o Nástic non perdoou. Un disparo de Arpón sorprendeu ao gardameta local aos dez minutos de iniciarse a segunda parte.
Os cataláns non se conformaron co 0-1 e acometeron duramente a defensa ferrolá. Seis minutos despois do primeiro gol, Miku sentenciaba o partido cun segundo tanto nun man a man con Queco Piña. Os tres puntos marchan para Tarragona e a maldición segue na Malata.
Tras un comezo de temporada inmellorable, o Ferrol perde aire. Con esta derrota, o Racing sitúase provisionalmente no posto 12 da táboa, a dez puntos do líder -o Numancia cun partido menos-.
10/11/2007
