L-V.
O Dépor empézase a impacientar. O equipo herculino continúa medrando no xogo, pero continúa sen abandonar os postos baixos da táboa. O fútbol combinativo dos de Lotina ante o Espanyol, o Sevilla, o Valencia e o Madrid deu un froito escaso de tres puntos, algo que os deportivistas deberán comezar a amañar mañá ante o Mallorca en Riazor.
O capitán Manuel Pablo foi ben claro onte ao asegurar que a aposta do equipo galego polo bo xogo non vale se os xogadores non conseguen mellorar a clasificación. “Volver xogar ben e volver perder non serve de nada. Toca gañar pola situación na que estamos, porque xogamos na casa e porque é necesario”, comentou o deportivista.
'Os erros páganse'
O xogador canario lamentou os erros cometidos polo seu equipo ante o Real Madrid, fallos que lle impediron sacar algo positivo da súa visita ao conxunto merengue. “Seguimos cometendo erros e contra equipos como o Real Madrid páganse. Fixemos un erro tan determinante como un penalti, que é a ocasión máis clara de gol, así que aínda que estamos plantando cara aos rivais, non serve de nada porque cometemos erros”, apuntou o lateral dereito.
“Os dous primeiros goles que encaixamos chegan tras contraataques nosos nos que perdemos o balón e o adversario fainos outro ataque. Podemos cometer un erro, pero temos que corrixilo na mesma xogada”, insistiu. Manuel Pablo, quen recoñeceu desfacer o fóra de xogo no segundo gol dos brancos, insistiu en que os coruñeses deben amañar eses fallos para non repetilos nas próximas xornadas da Liga, como a de mañá ante o Mallorca no estadio de Riazor.
“O Mallorca está moi ben, está conseguindo moitos goles, ten xente con calidade e rapidez arriba, e vai ser difícil, pero hai que estar concentrados e seguir na mesma liña en ataque”, declarou o defensa do Deportivo, consciente de que unha derrota na casa traería as alarmas á afección, que só viu unha vitoria do seu equipo na Coruña durante esta tempada.
30/10/2007
