AGN.
A Asociación Pola Defensa da Ría de Pontevedra (APDR) convoca unha nova mobilización para pedir o peche da planta cloreira de Elnosa no complexo de Lourizán. A concentración será mañá martes 30 de outubro ás 20.30 horas na Praza da Peregrina de Pontevedra.
A plataforma ecoloxista demanda con esta manifestación cidadá que as administracións públicas "cumpran coa legalidade" e procedan a pechar a planta de Elnosa. Lembran que precisamente o 30 de outubro expira o prazo para que a cloreira obteña a Autorización Ambiental Integrada que precisa para manter a súa actividade na Ría de Pontevedra.
Medio Ambiente non lle outorgou a empresa a autorización requerida e, de non conseguila, enfrontaríase a sancións e ata ao peche da planta se mantén en funcionamento o complexo de Lourizán. Esta é a tese da plataforma, coa que en cambio a empresa non está de acordo.
Segundo Elnosa, ao estarse a tramitar o expediente da Autorización Ambiental Integrada, que Medio Ambiente aínda non resolveu concedéndolla ou denegándolla, a cloreira sostén que non se aplica esta data límite.
'Elnosa non vai desaparecer mañá'
A APDR, que nos últimos anos se caracterizou pola súa oposción frontal ao complexo industrial Ence-Elnosa de Lourizán, admite con todo que esta manifestación non pretende conseguir o peche inmediato de Elnosa.
"Sabemos que iso non vai pasar e que por moito que nos mobilicemos, o día 1 de novembro Elnosa seguirá aí, pero queremos que a Administración se pronuncie, e diga por qué non a pecha e por qué se está a incumprir a lei", sinalou a voceira da APDR, María Peón.
Problemas xurídicos
O certo, é que o traslado da electroquímica de Elnosa fóra do complexo de Lourizán veuse complicado nas últimas semanas con dúas sentenzas xudiciais que anularon o informe municipal desfavorable á situación da cloreira na ensenada da Ría de Pontevedra.
Segundo o informe do concello, Medio Ambiente en ningún caso podería emitir a autorización ambiental integrada á fábrica de Elnosa en Pontevedra. O concello baseábase en que a fábrica de cloro non se axusta á ordenación urbanística actual e nas negativas repercusións medioambientais das instalacións, para informar negativamente sobre a planta.
Ambas sentenzas deixaron en mans da Consellería de Medio Ambiente outorgar ou non a polémica autorización ambiental, pero abriron a porta a que Elnosa poida iniciar os trámites para conseguila, polo que a súa estancia na Ría sen o preceptivo documento podería prorrogarse.
29/10/2007
