Xeración Dixital

Galicia liderou o paro durante o terceiro trimestre do ano ó rexistrar un descenso de 10.400 desempregados respecto ó mes de xuño, o que a sitúa como a rexión onde máis se reduciu o paro en comparación co segundo trimestre en términos absolutos, segundo os datos da Enquisa de Poboación Activa (EPA) publicada polo Instituto Nacional de Estatística (INE).

Segundo estes datos, Galicia conta ó término do mes de setembro cun total de 87.500 persoas que buscan emprego, ó tempo que a taxa de paro na comunidade galega caeu ó 6,7%. Ademais de situarse por debaixo da media estatal (8,03%), trátase da taxa de desemprego máis baixa dende o cuarto trimestre de 1981, segundo indicou o conselleiro de Economía, José Ramón Fernández Antonio.

Maior descenso absoluto
No período xullo-setembro, Galicia foi a comunidade na que máis se reduciu o desemprego en cifras absolutas (-10.400 parados), por diante de Asturias (-8.500) ou Castela- A Mancha (-6.600).

En términos porcentuais, a comunidade galega foi a quinta na que máis descendeu o número de persoas que procuran emprego (-10,6%), despois de Asturias (-19,9%), Baleares (-18,2%), Navarra (-17,5%) e Cantabria, onde a caída foi do -11,2%. No conxunto de España, o paro medrou no terceiro trimestre do ano nun 1,8% ó contabilizar 31.900 parados máis que en xuño.

En canto ó nivel de ocupación, os datos da EPA sinalan que Galicia conta cun total de 1.215.100 persoas ocupadas, o que representa un incremento de máis de 100.000 persoas respecto ó segundo trimestre de 2005, cando se produciu o cambio de Goberno na Xunta.

Dos 87.500 parados que se contabilizan en Galicia ó término do terceiro trimestre, 46.000 son mulleres e 41.500 son homes. Con todo, a taxa de paro masculina (5,76%) segue estando afastada do índice de desemprego feminino, que se situou en Galicia no 7,91%.

Por provincias
A nivel provincial, a enquisa elaborada polo INE coloca a Pontevedra como a provincia galega con maior taxa de desemprego (7,6%), seguida da Coruña (6,8%), Ourense (5,6%) e Lugo, onde o índice de paro caeu ata o 4,8%.

En todo caso, as dúas provincias occidentais seguen sendo as que aglutinan un maior número de persoas en situación de desemprego, xa que A Coruña e Pontevedra contabilizan 36.900 e 35.300 parados, respectivamente. Pola súa parte, Ourense rexistra 8.200 desempregados e Lugo consolídase como a provincia galega con menos parados, ó contabilizar 7.100 persoas nesta situación.