A China lanzou con éxito a súa primeira sonda lunar, en misión de exploración. Ábrese así o camiño que lle permitirá poñer un home na Lúa antes do 2020. O satélite, o Chang'e I, ten como obxectivo fotografar a superficie e analizar a súa composición.
Xeración (Santiago).
O lanzamento da primeira sonda lunar china pasará a engrosar as efemérides do 24 de outubro. Nunha misión de exploración, o satélite Chang'e I emprendeu o seu periplo espacial dende a base de Xichang, no suroccidente da China. O país oriental deu un paso de xigante no seu camiño para poñer a un home na Lúa antes do 2020.
O obxectivo da misión será facer fotos en 3D da superficie lunar para poder analizar a súa composición e medir o seu espesor, uns datos que non se obteron polo dagora en ningunha das visitas ó satélite.
Para isto, o Chang'e I está equipado con cámaras de alta definición e espectómetros de raios X. Estes últimos son necesarios para a clasificación dun espectro composto de 14 minerais, unha pequena parte do cento que se identificou na Lúa.
Ansias de conquista
Son varias as nacións, China incluída, que perseguen a colocación dunha base permanente na Lúa. Pero ningunha delas calcula conseguilo antes do 2020. Ata daquela, os esforzos concéntranse en ampliar coñecementos sobre o satélite terrestre, e mellorar a tecnoloxía para gañar a carreira cara a súa conquista. E, de momento, a China toma a dianteira.
A Nasa xa recoñeceu os méritos do país oriental. No 2003, co lanzamento do Shenzhou V, converteuse na primeira nación asiática en usar o seu propio cohete para poñer un home no espazo. A terceira tendo en conta as alunizaxes tripuladas que emprenderan a desaparecida Unión Soviética e dos Estados Unidos. A honra de ser o primeiro taikonauta chino correspondeulle a Yang Liwei.
Programa da viaxe
O satélite Chang'e I ten previsto entrar na órbita de transferencias entre a Terra e a Lúa o vindeiro 31 de outubro, e facerse coa órbita lunar o 5 de novembro. Segundo o previsto, enviará a primeira imaxe a finais do vindeiro mes, pero ficará en misión de exploración durante todo o ano.
Este lanzamento supón o arranque da primeira fase do programa lunar chino, que se completará co lanzamento doutro vehículo espacial que alunizará no 2012, e coa chegada dos primeiros astronautas a este satélite dentro duns 15 anos.
1956: o comezo
O programa espacial da China arrancou en 1956, pouco despois de que o líder comunista Mao Zedong lamentase que o país non era quen de enviar sequera unha pataca ó espazo. Contou dende o primeiro momento co apoio soviético.
Agora, a nave Chang'e I pretende repetir a fazaña da deusa china do mesmo nome. Segundo conta a lenda, esta viaxou á Lúa grazas a un xarope que a transportou ata alí, e conta cun cráter bautizado co seu nome. O satélite repetirá o percorrido de 380.000 quilómetros da muller da Lúa.
O medo dos veciños
Dado que o 95% da tecnoloxía espacial pode ter aplicacións militares, hai países que ven con recelo o novo vigor da industria china.
O medo nótase principalmente nos veciños India e Xapón, que tamén queren desenvolver os seus propios viaxes espaciais, e nos EEUU, que temen que Pekín empregue o programa con fins militares.
O primeiro explorador xaponés comezou a orbitar a Lúa o pasado 5 de outubro, e colocou ó país na liña de saída da carreira espacial a carón dos Estados Unidos, Rusia, a India e a China.
24/10/2007
