Xeración Dixital

O consenso foi, a xuízo de Xosé Crespo a máxima de funcionamiento da Federación Galega de Municipios e Provincias durante os últimos catro años. O alcalde de Lalín afronta o seu último mes como presidente da Fegamp, tralo que quere volver pór sobre a mesa a proposta da fusión de municipios.

PREGUNTA: Foi polémico o seu desexo da fusión de concellos. ¿Pensa retomar o tema unha vez que deixe a Fegamp a final de mes?

RESPOSTA: Agora vou retomar moitas cousas que tiven aparcadas para que non dixeran aquilo de que "este predica baixo o paraugas da Fegamp". A Universidade de Santiago realizou un estudo exclusivamente técnico que demostraba que a fusión de municipios era recomendable e que sería un elemento fundamental para acabar co inframunicipalismo. Eu tiña o tema como 'hobby', porque son municipalista.

Hoxe, algún concello xa case é un xeriátrico e nós propúñamos a fusión de varios en un. O que pasa é que ese tema 'escocíalle' a moitos alcaldes, sobre todo do PP, pero tamén a outros. Agora volverei a falar coa universidade e gustaríame que opinaran as tres, porque hai cousas de comer coas que non se debe xogar.

P: ¿É un tema que corre présa?

R: O tema da modernización local tería que xurdir o antes posible xa que a Administración local está bastante atomizada. As cidades e concellos grandes non teñen problemas, pero os municipios pequenos si, porque non poden dar os mesmos servizos. Isto non o van arranxar nin as deputacións nin as áreas metropolitanas, solucionaríase se varios concellos se xuntaran e fixeran un só, se non de dereito, si de feito.

P: ¿E o papel das mancomunidades?

R: Se funcionaran, son boas. O problema é que a realidade demostra que as mancomunidades funcionan mal, porque un concello que non traballe axeitadamente bloquea aos outros. E ao final, uns por outros a casa sen barrer. Funcionarían se dependeran dun único mando, o problema é que hai moitos mandos. En Galicia, se en lugar de 315 concellos houbera 50, arranxaríanse moitos problemas.

Encarar outra etapa
P: Nesta nova etapa política, ¿agárdao algún novo cargo dentro do PPdeG?

R: Dentro do partido son o secretario de organización, e xa me chega.

P: ¿E de cara á campaña electoral? As xerais están á volta da esquina.

R: Eu na campaña teño un cargo, son director dunha área. Estou na cúpula da dirección do partido, suponse.

P: ¿Suponse?

R: É que non tiña moito tempo para o partido, para nada. O concello, a deputación e a Fegamp non me deixaban tempo. De feito, algunha semana ocupoume máis tempo a Federación que o concello. Agora non van inventar un cargo novo no partido para min, porque xa teño un cargo importante. Terei tempo para exercelo e aí estarei.

P: ¿Vese o mundo de xeito diferente desde a oposición e desde o Goberno?

R: O mundo vese exactamente igual, outra cousa é que nun lado as cousas son máis fáciles e noutro, máis complicadas. Pero a democracia é unha curva sinusoide e tanto estás enriba como te vas ao carallo. Hoxe estás na oposición e mañá no Goberno. E eu penso que é bo. É bo para a democracia e para nós, porque se ven as cousas de distinta maneira. Por exemplo, ao BNG veulle estupendamente estar no Goberno. Polo menos saben que unha cousa é predicar e outra é dar trigo.

A peaxe do Deza
P: As protestas pola peaxe da autopista Santiago-Lalín están de plena actualidade. ¿Cre que o PP fixo unha mala xestión ou que o actual Executivo non está actuando axeitadamente?

R: O Goberno actual non se pode escudar en que esa é unha concesión que data da época na que gobernaba o PP. Tamén o era a circunvalación de Logroño e Campomanes-León e a unha metéronlle a supresión e a outra, unha redución. Por tanto, ese é un argumento peregrino, non vale.

P: E por onde pasa a solución?

R: O que ten que facer a Xunta é buscar sistemas que rebaixen o custo. A autopista foi concedida como autopista Santiago-Ourense e non ten sentido que unha metade pague unha peaxe altísima e a outra, nada. A proposta do PP era prorratear esa peaxe e que o que vai a Ourense pague os 4,80 euros e o de Lalín a metade. Agora, xa que se empeñan que o de Ourense sexa gratis, pedimos a gratuidade para Lalín. Son 45 kilómetros dos máis caros de España e cambiar a situación é cuestión de vontade política e non vale escudarse en quen fixo a concesión. Se o PP estivese gobernando, pediríamos a gratuidade igual.