Xeración (Santiago).
Un dos obxectivos dos videoxogos é acadar un maior realismo posible, ata chegar ó ideal de 'realidade virtual' que tantas veces vimos nas películas e que semella tan afastado. Despois da revolución que supuxo o mando interactivo da consola Wii e a súa 'actualización' para os pés, que sairá en 2008, chega o último gadget para as consolas: o chaleco '3rd Space'.
Da ciencia ó ocio
De novo, os avances da ciencia traspásanse ó ámbito do ocio. Un médico estadounidense creou un chaleco para palpar o corpo dos pacientes a distancia e recibir a súa reacción.
Agora, a súa versión simplificada, o '3rd Space' chegará ós xogos FPS (First Person Shooters) cuxa función é a de facer sentir os impactos de balas ou golpes que reciben as súas personaxes na pantalla. O dispositivo emprega a presión do aire para exercer presión nos lugares onde os xogadores foron golpeados, coma se estivesen en pleno campo de batalla.
Polo momento, este gadget funcionará só co xogo 'Call of Duty 2', o seu prezo ronda o 170 dólares e sairá á venda en novembro con conexión USB. O ano que vén tamén estará dispoñible para as modalidades de automóbiles e voos. ¿Atréveste a xogar?.
22/10/2007
