Xeración Dixital

"Zeltia xa fixo o máis difícil". Son as verbas do presidente de Zeltia, José María Fernández Sousa-Faro. Fala así tras coñecerse que a Axencia Europea para a Avaliación dos Produtos Médicos, a Emea, xa aprobou a comercialización do fármaco Yondelis para o tratamento de sarcoma en tecidos brandos. O medicamento estará no mercado español a inicios do vindeiro ano.

PREGUNTA: A Emea aprobou hai unhas semanas a comercialización de Yondelis na UE, Zeltia percorreu un longo treito ata acadar a 'luz verde'.

RESPOSTA: Moi longo, pero todo é relativo. Fan falla moitos anos, e en España non hai tradición. Pero nós sempre tivemos confianza en Yondelis.

P: ¿Cando cre que poderá comercializarse en España?

R: Pronto. Xa estamos comezando a comercializalo nos países de Europa que non requiren o trámite da negociación de prezos, como Alemaña e Gran Bretaña. E agora estamos negociando coas autoridades de Francia, España, Portugal, Italia.

P: ¿Cal será o seu prezo?

R: En España aínda non o negociamos. Pero penso que o prezo será moi similar en toda Europa porque temos a concesión de droga orfa para unha enfermidade de difícil tratamento, e normalmente iso conleva que o prezo sexa practicamente o mesmo en tódolos países da UE.

P: Vostede xa falou dalgunha cifra.

R: En Alemaña e Gran Bretaña estase vendendo o ciclo de tratamento a 5.050 euros.

P: ¿O gasto asumirao o paciente ou será asumido pola Seguridade Social?

R: En principio asumirao a Seguridade Social. Así é na maioría dos países, salvo que algún paciente decida ir pola vía do sector privado.

Novos fármacos
P: Zeltia continúa investigando con novos compostos que a curto prazo poderían converterse en novos fármacos, ¿cales son as expectativas?

R: Temos moi boas expectativas para Yondelis aplicado ó cancro de mama e de ovario. E tamén nalgún outro tumor, que iremos anunciando. Os estudos xa están en marcha e levan o seu tempo. Dende que se descubre un fármaco ata que se pon no mercado pasan unha media de 15 anos. Os estudos para as novas aplicacións de Yondelis van ben e se segue así, poderemos rexistrar o medicamento tamén para combater eses tumores.

P: ¿Cando cre que será posible?

R: É difícil de dicir. O que si podo dicir é que para o estudo de Yondelis en cancro de ovario xa rematou o recrutamento de máis de 600 pacientes e agora estamos agardando a que maduren os datos para saber como responden ó tratamento no tempo. Logo presentaremos un dossier de rexistro. Debería ser en 2008.

P: ¿E chegarán tamén novos fármacos da man de Zeltia?

R: A Aplidina. Aí estamos pensando en catro tumores, onde a Aplidina ten actividade: son o mieloma múltiple, que representa o 16% de tódolos cancros hematolóxicos; o neuroblastoma, que é un cancro pediátrico, e tamén o melanoma e o cancro renal.

Zeltia na bolsa
P: Yondelis xa está no mercado. ¿Como cre que se reflectirá esta circunstancia na cotización de Zeltia a curto ou medio prazo?

R: É difícil sabelo. Ó mellor nós estamos facendo as cousas ben e o valor da compañía non se reflicte en bolsa porque hai outros factores. Hai só unhas semanas vivimos unha crise bursátil que fixo que a maioría dos valores baixasen. O Ibex caeu moito. O que si podo dicir é que eu creo que Zeltia ten moito valor, sobre todo coa aprobación para comercializar Yondelis. E podo tamén dicir que seguiremos creando valor. O máis difícil xa o fixemos, porque eramos novatos, nunca rexistraramos ningún produto. Fomos a primeira empresa española que rexistra un fármaco na UE. Foi un longo proceso de aprendizaxe e agora sabemos moito. E sabemos, probablemente, como levar a cabo as seguintes etapas.