AGN (Santiago).
O conselleiro de Economía e Facenda da Xunta de Galicia, o socialista José Ramón Fernández Antonio, destacou que o investimento por habitante prevista nos Orzamentos para o ano 2008 situase nos 1.160 euros (3.165 millóns de euros en total). "Esta cifra está cinco puntos por riba da media das comunidades autónomas", asegurou.
Fernández Antonio considera clave a política de contención do gasto público e o incremento do aforro desenvolvida polo bipartito dende a súa chegada a San Caetano no ano 2005, "o que permite financiar o conxunto dos investimentos planificados de cara ó 2008".
Despois de entregar o proxecto de Lei de Orzamentos de Galicia para o ano 2008 á presidenta do Parlamento, Dolores Villarino, o conselleiro de Economía presentou as contas ós medios de comunicación. "Galicia medra de xeito sólido e equilibrado, grazas ó cumprimento claro dos obxectivo que nos marcamos en anos anteriores", dixo.
Declaración "de libro"
O representante do Executivo galego cualificou dunha "mera declaración de libro da oposición" as dúbidas do PPdeG en torno ó crecemento previsto polo bipartito para o vindeiro ano. Confirmou ademais que o "impulso ó investimento produtivo para mellorar a competitividade da economía galega e o reforzamento das políticas sociais" son os dous grandes eixos dos Orzamentos.
Con respecto ó primeiro dos eixos, a sociedade do coñecemento, a mellora das infraestruturas, o fomento dun novo modelo de transporte público e o desenvolvemento do reequilibrio territorial serán as principais prioridades de gasto.
No referente ás políticas sociais, os grandes obxectivos son as melloras ó usuario do sistema público de saúde, a atención ás persoas dependentes, o acceso á vivenda e a promoción dun emprego estable e de calidade. "Melloraremos a calidade dos servizos públicos", afirmou Fernández Antonio.
2.000 millóns para persoal
O proxecto de lei dos orzamentons para 2008 en Galicia recolle uns gastos de persoal de 1.985 millóns de euros para o conxunto da Administración, incluíndo altos cargos, persoal de confianza, funcionarios e incentivos ao rendemento.
Desta cantidade, 11,5 millóns destinaranse a pagar as nóminas dos altos cargos e delegados da Xunta. Outros 8,5 millóns investiranse no persoal eventual para todas as Consellerías. A partida máis importante, superior aos 1.500 millóns de euros é necesaria para os gastos do funcionariado que depende de San Caetano.
O proxecto orzamentario presuposta entre os gastos en bens correntes e servizos, 22,5 millóns en concepto de alugueiro de instalacións e pago de distintos cánones, 16 millóns en reparacións, mantemento e conservación. Outros 380 millóns de euros na adquisición de material e diversos subministros.
Auxe do I+D+i
O conselleiro de Economía referiuse tamén ás importantes partidas destinadas ó aprendizaxe de linguas estranxeiras, o auxe do I+D+i e a posta a disposición das empresas de novo solo industrial. "Temos que terminar coa situación de pescozo de botella para a chegada de compañías", apuntou o dirixente socialista.
Por outra parte, referiuse á importancia que terá a nova figura das axencias públicas galegas, "que axudarán na xestión dos obxectivos e no control dos resultados, gañaremos en eficacia e eficiencia".
Crecemento do 4%
O conselleiro de Economía prevé que a comunidade autónoma peche o presente ano cun crecemento económico do 4% e considerou viable a creación de 32.400 novos postos de traballo ó longo de 2008.
Os gastos non financeiros previstos nos Orzamentos medran un 7,3%, ata os 10.960 millóns de euros, e o investimento real alcanza os citados 3.165 millóns. O aforro para financiar este investimento aumenta un 11,3%, ata os 2.032 millóns, e a débeda cae ata o 6,1% do PIB, fronte ó 7,35% do ano 2005.
"Estamos ante uns Orzamentos que medran lixeiramente por riba do PIB nominal, para impulsar a actividade económica e xerar recursos que consoliden unha sociedade avanzada e melloren o benestar dos cidadáns galegos", concluíu Fernández Antonio.
19/10/2007
