Xeración Dixital

O tempo medio que os pacientes galegos permanecen en lista de espera para someterse a unha operación cirúrxica situouse o pasado 30 de setembro en 106 días, doce menos que na mesma data que o ano pasado, segundo os datos anunciados polo Sergas. As cifras son, con todo, peores que as do 30 de xuño de 2007, cando a lista de espera se situou nos 80 días.

O Sergas móstrase aínda así satisfeito da evolución das listas de agarda. Entre os factores que impediron unha mellora máis contundente nos últimos meses, o secretario xeral do organismo, Cayetano Rodríguez Escudero, sinalou “a folga dos interinos e os problemas ao redor da OPE”. As especialidades con máis problemas no capítulo de listas de espera son traumatoloxía, oftalmoloxía e cirurxía xeral.

Consultas externas
Polo que respecta ao apartado das consultas externas, o tempo medio de espera situouse o pasado 30 de setembro nos 84 días, dous máis que hai un ano. Cirurxía vascular, traumatoloxía e xinecoloxía son as especialidades con máis atraso.

O Sergas recoñece a súa preocupación por este lixeiro ascenso, pero xustifícase en que as medidas postas en marcha para a súa redución darán resultado máis a longo prazo, posto que supoñen un cambio na organización e na citación dos pacientes.

Neste sentido, Rodríguez Escudero destacou a paulatina implantación na comunidade das consultas de acto único, para agrupar nun mesmo día todas as probas necesarias para detectar unha patoloxía. Este servizo pode supor un incremento a curto prazo das listas de espera, pero os resultados definitivos serán satisfactorios.

Distinta segundo o hospital
Por centros, Povisa, en Vigo, é o hospital galego no que os enfermos teñen que esperar máis tempo para ser operados (198 días). Tras el sitúanse o Xeral-Calde de Lugo, con 111 días, o Marcide de Ferrol, con 108 días, e o Juan Canalejo da Coruña, con 106 días. Nas consultas externas, o peor é o Hospital da Costa, con 108 días.