Xeración Dixital

A Academia das Artes e das Ciencias Cinematográficas de España seleccionou dúas pezas galegas como candidatas ao Goya á Mellor Curta Española de Animación, segundo publica na súa web. Trátase de O bufón e a infanta, de Dygra Films, e A flor máis grande do mundo, de Continental.

Tras coñecer as candidaturas, Dygra emitiu un comunicado para expresar a "satisfacción do equipo pola nominación" á película dirixida por Juan Galiñanes, que xa obtivo un premio do Concello de Cádiz e foi seleccionada para as seccións oficiais de festivais como Animadrid, Animacor, Sitges, Alcine ou a Semana Internacional de Cine Fantástico de Málaga.

Un Velázquez que cobra vida...
O bufón e a infanta presenta unha estética innovadora inspirada na pintura barroca de Velázquez para abordar o tema das falsas aparencias e os prexuízos que levan ao engano.

"Gañemos ou non, estamos convencidos de que a curta dará moito que falar e non só en España", declarou Manolo Gómez, produtor e director dos estudos coruñeses de animación. O bufón e a infanta iniciará o seu percorrido internacional o vindeiro ano, avalado xa pola nominación da Academia do Cine.

O director da curta, Juan Galiñanes, aproveitou a ocasión para indicar que as curtas serven como vía experimental para explorar técnicas diferentes que se poidan aplicar despois ás longametraxes e para descubrir novos valores no equipo.

...e un Nobel que narra unha flor
A flor máis grande do mundo, dirixida por Juan Pablo Etcheverry, narra coa voz do Nobel de Literatura José Saramago un conto dirixido non só a un público infantil senón tamén aos adultos, no que predomina a idea do respecto á natureza.

Producida por Continental e co financiada con 20.000 euros pola Consellería de Cultura, a curtametraxe está protagonizada por un neno duns sete anos que unha tarde de verán decide explorar o mundo existente a cinco minutos da súa casa. Na súa viaxe atopará unha flor murcha, á que decidirá axudar para que volva coller azos.

O director da multipremiada Minotauromaquia abordou o traballo con plastilina combinada con ilustracións, realizadas por Diego Mallo, e conta coa composición musical de Emilio Aragón.

Outras candidaturas
Xunto a A flor máis grande do mundo e O bufón e a infanta, competirán ao Goya á mellor curta de animación as producións Atención al cliente, de Marcos Valin e David Alonso; Perpetuum mobile, de Raquel García-Ajofrin Virtus e Enrique García Rodríguez, e Tadeo Jones y el sótano maldito, de Enrique Gato.