A Consellería de Vivenda presentou ante Fomento unha alegación na que pide a modificación do trazado do AVE ó seu paso polo Carballiño. Sostén que, de verse afectado o parque empresarial, impediríase a implantación de 16 novas empresas e perderíanse ata 592 postos de traballo.
Xeración (Santiago).
A Consellería de Vivenda presentou unha alegación ante o Ministerio de Fomento coa que pretende evitar que o trazado do AVE ó seu paso pola localidade ourensá do Carballiño afecte ó seu parque empresarial.
Advirte de que impediría a implantación de 16 novas empresas no Polígono Industrial, actualmente en proceso de ampliación, e de que afectaría ás 33 empresas xa instaladas. Perderíanse, segundo a Consellería, ata 592 postos de traballo directos.
Deste xeito, Vivenda propón desbotar as alternativas de trazado 1 e 4 para aplicar as 2 e 3, que transcorren polo norte do Carballiño e que permitirían a unión de Ourense e Vigo sen causar prexuízos no tecido empresarial da vila. Asi mesmo, defende estes vieiros por considerar que posúen un custo moito menor, tanto na execución da obra coma na adquisición dos terreos.
Para o departamento que dirixe a nacionalista Teresa Táboas, a alternativa 1 é máis molesta, ademais, dende un punto de vista medioambiental e da funcionalidade ferroviaria.
16/10/2007
