AGN (Santiago).
A escritora canadense Erín Moure presenta hoxe martes en Santiago a edición bilingüe galego-inglés do poemario Teatriños ou aturuxos calados, xunto á tamén poeta Chus Pato e ao responsable de edicións en Galaxia, Carlos Lema. O acto desenvolverase ás 20:00 horas na librería Couceiro da capital galega.
Teatriños ou aturuxos calados é un dos poemarios máis importantes de Moure, traducido ao inglés por María Reimóndez. O libro foi concibido a partir dunha estadía da autora en Galicia e do seu contacto co idioma e a cultura galega.
Con este mesmo poemario, Moure foi finalista do Griffin Poetry Prize no ano 2006, un dos premios máis importantes da literatura anglófona do mundo.
O poemario é unha encrucillada de linguas e voces no que o inglés e o galego flúen como correntes dun mesmo río, xa que algúns dos poemas foron escritos orixinalmente en galego e logo trasladados ao inglés pola autora, segundo informa a editorial nun comunicado.
Unha carreira vinculada á poesía
Erín Moure naceu en Alberta (Canadá) en 1955. A súa obra abrangue doce títulos de poesía, como A frame of the book, Search Procedures, Furious, WSW, O cidadán e O cadoiro, nos que amosa a súa paixón pola mestura de linguas.
16/10/2007
