A.C.B. AGN.
A editora pontevedresa OQO recibirá hoxe de mans do ministro de Cultura, César Antonio Molina, o primeiro premio ao Libro Mellor Editado, na categoría de Literatura Infantil por O gran libro dos retratos de animais.
A entrega do premio, fallado o pasado mes de abril en Madrid, desenvolverase no marco da Feira Profesional do Libro Liber de Barcelona e recoñecerá a calidade da edición da obra.
Escrito e ilustrado por Svejetlan Junakovic, o libro inaugurou a colección OQART de arte para nenos. O volume, que conta xa con edicións en galego, castelán e portugués, coñecerá a súa versión ao inglés e ao francés nas vindeiras semanas, segundo informou a editora nun comunicado.
O xurado, composto por representantes da Dirección Xeral do Libro, Arquivos e Bibliotecas do Ministerio, editores, impresores e persoeiros da edición no Estado, valorou libros incluídos en cinco grupos: libros de arte, de bibliofilia, facsímiles, infantís e libros de divulgación.
Máis premios
Outras dúas editoriais galegas foron distinguidas nos últimos Premios Nacionais de Edición que outorga cada ano o Ministerio. Galicia acaparou dous dos tres premios nacionais de edición de libros infantís e xuvenís e obtivo por primeira vez a máxima distinción na cateogría de Libros de arte.
Así, Pucho, o habitador dos tellados, de Manuel Janeiro e editado por Kalandraka, obtivo o terceiro posto dentro da categoría de libro infantil. Pola súa banda, Faktoría K acadou o primeiro premio de Libros de Arte por Animalario: Arte de la India, de Kanchana Arni e Gita Wolf.
Non é a primeira vez que Kalandraka e OQO obteñen un Premio Nacional. Kalandraka xa vai polo sexto, mentres que OQO recibira o ano pasado outro polas ilustracións de A princesa que bocexaba a todas horas, a cargo de Elena Odriozola, e o terceiro Premio Nacional de Edición, por Celestino Tarambainas.
Tanto Kalandraka como OQO participan na Feira do Libro de Barcelona cun stand propio, e a vindeira semana volveranse atopar en Frankfurt coas súas respectivas casetas.
03/10/2007
