Xeración /AGN (Santiago).
O Bloque Nacionalista Galego (BNG) denunciou hoxe, xornada na que se celebra o Día Europeo das Linguas, que o galego non sexa aínda lingua oficial no Parlamento Europeo e que, polo tanto, non poida ser empregada polos eurodeputados galegos.
A responsable de asuntos europeos do BNG, Ana Miranda, lamentou que a Mesa da Eurocámara, órgano responsable das cuestións lingüísticas nesta institución, "impida que a lingua galega, vasca e catalá poidan ser usados polos eurodeputados de Galicia, Euskadi e Cataluña".
En xullo do ano pasado, a Mesa (formada polo presidente do Parlamento e os seus catorce vicepresidentes) alegou dificultades técnicas para impedir o uso destas linguas no pleno da Eurocámara, aínda que si aprobou que os cidadáns puidesen enviar cartas á institución e recibir resposta nas mesmas.
Recoñecemento sen cooficialidade
Ana Miranda lembra que en xuño de 2005, o Consello de Ministros da UE, en resposta a unha petición de España, acordou o emprego do galego, o vasco e o catalán nas institucións comunitarias, pero sen elevalas á categoría de linguas oficiais da Unión.
Neste senso, Miranda considera que "habería que conseguir a oficialidade plena" modificando o Regulamento de 1958 que fixa o "réxime lingüístico da UE", de xeito que "os representantes da nosa cidadanía puidesen expresarse en Bruxelas na súa lingua".
A representante nacionalista entende que esas decisións do Consello de Ministros e da Mesa do Parlamento Europeo, "vulneran o cumprimento da Carta Europea de Linguas Rexionais e Minoritarias do Consello de Europa".
26/09/2007
