A. Espiño. AGN (Pontevedra).
Aproveitando as obras de remodelación que o goberno municipal de Pontevedra está realizando en todo o entorno do Campillo de Santa María, lugar escollido polos máis novos durante a fin de semana para practicar o fenómeno do "botellón", o concelleiro de Seguridade Cidadá, Guillerme Vázquez anunciou que "é un bo momento para estudar un lugar alternativo onde trasladar esta actividade".
Así, o concello anunciou a apertura dun período de consultas para "alcanzar unha solución de consenso" para esta nova ubicación, inicialmente coa Asociación de Veciños de Santa María, ao consideralos o "principal colectivo afectado", aínda que o goberno municipal asegura que escoitará outras opinións "para que a decisión final sexa ao gusto da maioría".
O principal requisito do novo emprazamento do botellón será "que ocasione as menores molestias posibles aos veciños, e que ademais cause o menor risco para os rapaces" e a ser posible que sexa preto da cidade, segundo explicou o responsable municipal da Seguridade Cidadá, "para que non teñan que desprazarse en vehículos co perigo que iso supón."
O edil nacionalista tamén entende que "nunca haberá unha solución boa" pero en todo caso considera que non debe manterse a situación tal e como está senón que debe abrirse a posibilidade dun traslado, xa que "temos a decisión e a convicción de tentar trasladar a ubicación física do botellón."
19/09/2007
