AGN (Santiago).
A Alameda de Pontevedra acolle entre hoxe e mañá (14 e 15 de setembro) o IX Campionato Nacional de Gabeo de Árbores, unha competición deportiva na que participarán unhas trinta persoas e que por primeira vez se celebra en Galicia.
A competición, que consta de cinco probas clasificatorias a realizar en dous días é unha simulación do traballo realizado diariamente polos trepadores de árbores, que serán xulgados por profesionais do seu mesmo ámbito, valorando a destreza, o esforzo, a técnica e a seguridade empregada.
Modalidades
As probas comezan coa modalidade de "Rescate", onde o trepador, ante a simulación dun accidente sufrido polo seu compañeiro de traballo, deberá rescatar ó ferido seguindo o protocolo de emerxencia, rescate e primeiros auxilios, despois do cal chega "Traballo", unha proba que consistirá en desempeñar varias funcións na árbore, o trepador deberá realizar o traballo de desprazamento pola árbore a disposición do obxecto de simulación.
O resto das probas son "Ondilla", onde valorarase a habilidade do trepador que debe lanzar unha ondilla que permitirá posteriormente colocar a corda para ascender á árbore; "Trepa rápida" na que o concursante demostrará a súa destreza, habilidade e forza ó trepar pola árbore ata unha altura de 18 metros no menor tempo posible; e "Presa de Pie", onde o trepador ascende por unha corda ata tocar unha campá situada a 14 metros.
Durante a celebración do campionato están previstas actividades complementarias como unha feria de Maquinaria, adicada ás empresas do sector arboricultor e obradoiros específicos para a mellora dos traballos de trepa.
14/09/2007
