Xeración Dixital

PSdeG e BNG refugaron hoxe a creación dunha comisión de investigación sobre o desdobramento da Vía do Barbanza, para convertila en autovía, xa que consideran que a infraestrutura outorgouse con todas as garantías. Os socios do Goberno bipartito acusaron ó PP de pretender "tapar" as súas irregularidades na Cidade da Cultura coa creación deste órgano parlamentario.

O novo portavoz do PPdeG, Manuel Ruiz Rivas, insistiu en que o novo Goberno contratou "a dedo" a unha empresa que fixese un segundo informe técnico para a adxudicación, e se concedeu a obra a unha compañía distinta da prevista cun "sobrecuste" para as arcas públicas de 31 millóns de euros.

'Cortiña de fume'
Tanto PSdeG como BNG defenderon a limpeza do proceso de adxudicación e atribuíron a unha "cortiña de fume" do PP o solicitar agora esta comisión de investigación, o mesmo día que se aprobou no pleno a creación dun órgano similar sobre a Cidade da Cultura.

O portavoz parlamentario do PSdeG, Ismael Rego, acusou ó grupo da oposición de utilizar a "mentira e a manipulación" sobre o suposto incremento do custe entre as dúas ofertas, xa que a Administración pública pagará 47.000 euros máis por diversas melloras en seguridade, e non 31 millóns como afirma o PP.

Pola súa parte, a portavoz de Infraestruturas do BNG, Carme da Silva, recriminou ó PPdeG que pretenda "botar sombras sobre o actual Goberno galego" para "tapar" as súas irregularidades. Considera que o actual Goberno actuou con "prudencia" ó solicitar un segundo informe técnico porque sería "moito dicir" que un documento elaborado polo anterior Executivo "é a única garantía" en vista das irregularidades detectadas na Cidade da Cultura.