Xeración Dixital

A escritora lucense Marta Rivera de la Cruz está "encantada, emocionada e agradecida" tras ser designada como pregoeira das festas patronais de San Froilán, e asegurou que será "un dos momentos máis bonitos da súa vida".

A proposta de que a escritora lese o pregón nas festas de Lugo prantexouna o grupo municipal do Partido Popular hai un mes. Agora os tres grupos políticos con representación municipal apoiaron a candidatura da literata, proposta dende a comisión de festas.

Marta Rivera foi finalista na última edición dos premios Planeta, e pouco despois viuse envolta no centro dunha polémica ó denunciar a suposta marxinación que viña sufrindo nas institucións galegas por escribir en castelán.

Iggy Pop non actuará en Lugo
A concelleira de Cultura, Concepción Burgo, recoñeceu que esta mesma mañá tiveron que desbotar a participación do artista estadounidense Iggy Pop, que preferiu actuar en Francia e "deixou na estacada" a Lugo e Zaragoza, a pesar de que o seu contrato estaba case pechado.

Para compensar a 'deserción', Burgo afirma que están a negociar "con outros artistas internacionais" que cubran o oco deixado pola 'Iguana'. Xa está confirmada a presenza de David Bisbal, Orishas, El Sueño de Morfeo, Deluxe, Ilegales, Burning e Mercedes Peón, entre outros. Hoxe confirmouse que tamén estarán os grupos cataláns The Pinker Tones DJ e Macaco.