Xeración Dixital

Seguramente o primeiro que se nos veña á mente cando falamos de Internet sexa a Web: páxinas que podemos visitar a través dun navegador, como esta noticia, sen ir máis lonxe. Ou ó mellor, no correo electrónico. Pero á hora de falar da cantidade de datos que se transmiten en Internet, os verdadeiros amos do fío son os protocolos P2P, destinados a transmitir grandes cantidades de datos entre iguales, é dicir, sen estar gardados nun servidor único. O intercambio de arquivos mediante P2P xera, segundo as estatísticas publicadas pola empresa Ipoque, entre o 50 e o 90% do tráfico de datos na rede.

E entre os distintos protocolos P2P, o líder en 'devorar' o ancho de banda é un dos últimos en chegar, o BitTorrent, que supera por segundo ano consecutivo ó eDonkey, a rede usada polo coñecido programa eMule, entre outros.

BitTorrent consume, segundo este estudio, entre o 50 e o 75% do tráfico dos protocolos P2P. E se contamos todo Internet, entre o 25 e o 65% dos datos da rede flúen polo BitTorrent. As cifras presentan unha marxe moi ampla pola grande dificultade de contabilizar a tódolos operadores do mundo, pero aínda que só fagamos caso das cifras máis conservadoras, os resultados anuncian que a cuarta parte dos datos do mundo pasan por BitTorrent.

Unha tecnoloxía moi recente
BitTorrent naceu no ano 2001, aínda que non se popularizou entre o gran público ata os últimos anos, polo que ten menos usuarios e arquivos que a rede eDonkey. Está optimizado para unha rápida transmisión de arquivos de grande tamaño, e os usuarios que teñen os datos e os que os desexan conectan entre eles de forma case instantánea, ó contrario que as grandes 'colas' da 'Mula'.

Estas características fixeron que as empresas que precisaban transmitir grandes cantidades de datos se fixasen en BitTorrent e decidisen que era unha tecnoloxía demasiado boa como para afogala en denuncias. Ademais da velocidade de descarga para arquivos grandes como películas ou software, o custo en ancho de banda redúcese exponencialemente, porque os usuarios que xa teñen os arquivos actúan tamén de fontes para as novas descargas.

Isto puxo a salvo á empresa de denuncias, mentres outras caían, acusadas de favorecer á copia ilegal de películas, software e música protexido por dereitos de autor. Sen embargo, BitTorrent adaptouse ó mercado e na súa páxina oficial podemos mercar películas e series de televisión de grandes produtoras como Paramount, Warner Bros, Fox, entre outras.

Mentres, o protocolo, libre, segue popularizándose entre os seus usuarios con opcións para todos os gustos, dende as que piden a berros que as copien, ata as 'piratas'.