Xeración.
O novelo da Cidade da Cultura enguedéllase cada vez máis. O último nó do fío márcao a Fiscalía do Tribunal Superior de Xustiza de Galicia, ao admitir a trámite a denuncia por presuntas irregularidades na xestión do faraónico proxecto do monte Galiás.
A denuncia fora presentada o pasado 13 de agosto por tres integrantes da CIG a título persoal: Mar Peteira, Xan Carlos Ansia e Xosé Manuel López Viqueira. Os tres forman parte ademais da recentemente constituída plataforma 'Cultura Si, Mausoleo Non'. Remitiron á Fiscalía o informe do Consello de Contas sobre a Fundación da Cidade da Cultura, acompañado doutras informacións. Reclamaban que o TSXG iniciase un proceso penal contra os responsables do proxecto.
Tras un primeiro estudo, a Fiscalía admite a trámite a denuncia, ao enteder que poden existir "indicios de criminalidade" na xestión do proxecto do Gaiás. Agora, correspóndelle ao Xulgado de Instrución número 2 de Santiago, presidido por Francisco Javier Míguez Poza, instruir a causa e investigar a denuncia en profundidade.
A comisión en entredito
Os denunciantes amósanse satisfeitos con esta decisión da xustiza de investigar "o despilfarro" que supuxo o proxecto do Gaiás. Consideran ademais que esta decisión do Fiscal pón en entredito a necesidade da comisión parlamentaria sobre o proxecto do monte Gaiás ao considerar que "se o TSXG admitiu a denuncia foi porque observou indicios de irregularidades".
Con todo, non parece que a decisión xudicial vaia supor a paralización da comisión parlamentaria. Precisamente, antes de coñecerse a decisión da Fiscalía semellaba que por fin había un acordo entre os tres grupos parlamentarios en que a Cámara galega investigase "a fondo" a xestión do Gaiás, tanto no que respecta ao goberno do PP como ao bipartito.
A conselleira de Cultura, Ánxela Bugallo, reiteraba esta mañá en declaracións á Radio Galega que comparecerá na Comisión parlamentaria e que non porá ningún tipo de obxección á investigación da Cámara da xestión da súa consellería. Sobre a decisión da Fiscalía, a Bugallo non quixo facer valoracións, cando menos ata que haxa unha sentenza.
"Se piden colaboración, darémola"
O secretario xeral do PPdeG, Alonso Rueda, asegurou que o partido está "absolutamente tranquilo" ante esta investigación xudicial sobre a Cidade da Cultura e non dubidou en ofrecer a colaboración dos populares á autoridade xudicial, asegurando que "se nola piden, darémola dende o principio".
Asimesmo sinalou que a investigación xudicial é "perfectamente compatible" cunha investigación política no Parlamento de Galicia e precisou que non existe ningún problema para que ambas se desenvolvan "de xeito simultáneo".
31/08/2007
