Axencias.
O presidente brasileiro Ignacio Lula da Silva reiterou nunha longa entrevista o xornal 'Estado de Sao Paulo' a súa intención de non presentarse á reelección unha vez que o seu segundo mandato remate no 2010. “Non haberá un 'se o pobo o demanda'. Remato o 31 de decembro e pasarei entón a banda presidencial a outro presidente da República o 1 de xaneiro de 2011 e irei preparar entón o coello asado que non fago dende hai máis de cinco anos”.
“Non existe ninguén que non sexa substituíble ou que sexa imprescindible. Cando un dirixente político comeza a pensar que é imprescindible, comeza a nacer un pequeno ditador”, reiterou Lula da Silva. Unha crítica que, mesmo se nomealos, parece dirixida a políticos sudamericanos como Hugo Chávez ou Evo Morales que preparan reformas constitucionais que posibiliten a súa reelección.
Malia isto, afirma que non se manterá á marxe do próximo proceso electoral. “Non serei neutral. Teño postura política, teño partido, e quero subir ó estrado [para apoiar a outros candidatos]”.
¿Unha presidenta?
E mesmo se aínda é cedo para saber quen será o que reciba o seu apoio, non descarta que o próximo candidato do Partido dos Traballadores (PT) sexa unha muller, como a xefa do gabinete Civil, Uma Dilma Rousseff, ou Marta Suplicy, antiga alcadesa de Sao Paulo e actual Ministra de Turismo. “As mulleres están en ascenso. Se Cristina Kirchner gaña en Arxentina e Hillary Clinton en Estado Unidos, nós imos ter unha onda de 'sexo forte' disputando as eleccións (...). Creo que é posible ter unha muller na presidencia.”.
Na entrevista, Lula tamén fala da metamorfose que sufriu o seu partido e a súa propia postura dende que se presentara por primeira vez á elección presidencial en 1989, “Non é posible que as persoas queiran que o partido do 2007 sexa o mesmo que o de 1989.
Sobre as diverxencias que esta transformación suscita no seo do partido, Lula afirma que "esa diversidade do PT é o que permite que a xente non vaia para a ultra-esquerda nin para a dereita. Que un fique nunha posición intermedia da política que pode ser posta en práctica, daquilo no que é posible estar de acordo coa realidade”.
27/08/2007
